nepal life

‘न्यादँय् आधारभूत महत्वया न्यागू ज्या याये’ –सहअध्यक्ष श्रेष्ठ

नेवा: अनलाइन न्युज – ललेन्द्र शाक्य | २०७४ कार्तिक २९, बुधबार ११:४९:३७

संघीय समाजवादी फोरम, नेपालया प्रतिनिधिसभा व प्रदेशसभा निर्वाचन घोषणापत्र–२०७४ छगू ज्याझ्वःया दथुइ पार्टीया सहअध्यक्ष व निर्वाचन घोषणापत्र मस्यौदा समितिया संयोजक राजेन्द्रप्रसाद श्रेष्ठं विमोचन यानाः सार्वजनिक यानादिल ।

उगु ज्याझ्वलय् नेपाःया परम्परावादी यथास्थितिवादी पार्टीतसिबें थःगु पार्टी नीति, सिद्धान्त व विचाः फुक्क ल्याखं न्हूगु ढंगया पार्टी जूगु धयादिसें वय्कलं थःगु पार्टीया मू एजेण्डा संविधान संशोधनया लिसें पहिचानलिसेंया संघीयता, समतामूलक समृद्धि व सुशासन जूगु धयादीगु दु ।

थःगु पार्टीया संलग्नाय् संघ व प्रदेशतय्के निर्माण जुइगु सरकारं ‘न्यादँय् आधारभूत महत्वया न्यागू ज्या’ यायेगु धयादिसें वय्कलं न्यादँ दुने उर्जा शक्तिइ आत्मनिर्भर जुइगु, मुक्कं गार्हस्थ उत्पादनया ५० प्रतिशत स्थीर पुँजीया रुपं विकास यायेगु, निगू अंकया आर्थिक बृद्धि हासिल यायेगु, प्रतिव्यक्ति आय दोब्बर थ्यंकेगु व निरपेक्ष गरिबीया रेखामुनी च्वंपिं जनतायात गरिबीपाखें मुक्त यायेगु धयादीगु खः ।

अथेहे झिदँ दुने आर्थिक रुपं आत्मनिर्भर याकेगु व देसयात विकासशील मुलुकय् रुपान्तरित यायेगु व नीन्यादँ दुने मुलकया जल, जमीन, जंगल, जडिबुटी, जनशक्तिथें जाःगु न्यागः ‘ज’ रुपी स्रोत साधनतय्गु अधिकतम उपयोग यानाः देसयात विकसित मुलुकया तुलनाय् थ्यंकेगु वय्कलं धयादीगु दु ।

पार्टीया छ्याञ्जे रत्नेश्वरलाल कायस्थं संचालन यानादीगु उगु ज्याझ्वलय् नेता श्रेष्ठं नीन्यादँय् राजधानीथें जाःगु थासय् मेलम्चीया म्हगस क्यनाः आःतक खानेपानीया व्यवस्थापन तकं यायेमफुम्ह एमाले, कांग्रेसथें जाःगु यथास्थितिवादी पार्टीतसें देसया विकास याये धाःगु ‘गोरु ब्याउँछ’ धकाः आशा यायेगुथें जक जूगु वय्कलं धयादीगु खः ।

‘उकिं आः नेपाःया उदयमान राजनीतिक शक्तिया रुपं फुक्क क्षेत्रय् थःगु ब्यागलं विकल्प ज्वनावःगु संघीय समाजवादी फोरम, नेपालयात अत्यधिक मतं त्याकादिसँ’ धकाः आग्रह यानादिल ।

सहअध्यक्ष श्रेष्ठं थःगु पार्टी एमलो माओवादीें ढँटुवा मजूगु धासें थःगु पार्टी विजयी जूसा संघय् प्रत्यक्ष निर्वाचित राष्ट्रपति व प्रदेशय् प्रत्यक्ष निर्वाचित मूख्यमन्त्रीया लिसें फुक्क तहलय् प्रत्यक्ष निर्वाचित कार्यकारी प्रमुख दयेकाः देसयात राजनीतिक अग्रगमनया दिशाय् यंकेगु धयादिल ।

Categorized in राजनीति