नेवा: अनलाइन न्युज – ललेन्द्र शाक्य | २०७४ आश्विन २७, शुक्रबार १४:२९:४८

वर्ल्ड नेवाः अर्गनाइजेशन जापान कवः व नेवाः बस्ती नेवाः स्कुल अभियानया ग्वसालय् शुक्रवाः येँया खुसिबुइँ च्वंगु नेपाः ब्यांक्वेटया हलय् तःजिगु ज्याझ्वः यासें ‘नेपालभाषा मचा सिरपाः’या घोषणा जुल ।

वाङमय शताब्दी पुरुष संस्कृतिविद् डा. सत्यमोहन जोशी मूपाहाँ कथं झायाः वय्कलं हे उगु सिरपाःया घोषणा यानादीगु खः ।

ज्याझ्वलय् पाहाँ कथं नेवाः न्ह्यलुवाःपिं लक्ष्मीदास मानन्धर, मल्ल के. सुन्दर, संस्कृतिविद् प्रा. डा. चुन्दा बज्राचार्य, पवित्र बज्राचार्य, नेपाः राष्ट्रिय पार्टीया नायः डा. विजय संैजु, पूर्वमन्त्रीपिं राजेन्द्र श्रेष्ठ, तीर्थराम डंगोल, दिलीप महर्जनलिसें नेवाः जागरण मञ्चया नायः सुजीव बज्राचार्य, वर्ल्ड नेवाः अर्गनाइजेशन नेपाः कवःया कार्यबाहक नायः शाक्य सुरेनपिन्सं आसन ग्रहण यानादीगु खः । पाहाँपिं सकलसित सभा नायः सुनिलकुमार शाक्यं खादा न्ययेकाः लसकुस यानादीगु खः ।

मचा सिरपाःया नितिं जापानय् च्वनाः आर्थिक रकम मुंकेगु ज्याय् संयोजन यानादीम्ह लिसें वर्ल्ड नेवाः अर्गनाइजेशन जापानया कजि व नेवाः जागरण मञ्च जापानया सल्लाहकार सुनिलकुमार शाक्यया सभापतित्वय् न्ह्याःगु उगु ज्याझ्वलय् भाजु शाक्यं हे लसकुस न्वचू बियादीगु खः ।

मूपाहाँ वाङमय शताब्दी पुरुष डा. सत्यमोहन जोशीं प्वप्वःचाय् ‘नेपालभाषा मचा सिरपाः’ च्वयातःगु घानाः उगु प्वप्वःचा ब्वयेकाः सिरपाःया उद्घोष यानादिसें घोषणा यानादीगु खः । उगु घोषणा ज्याझ्वलय् चीचाधिकःपिं मचातसें नं प्वप्वःचा ब्वयेकाः उलेज्या याःगु खः ।

नेपालभाषा मचा सिरपाःया परिकल्पनाकारलिसें नेवाः बस्ती नेवाः स्कुल अभियानया कजि दिपक तुलाधरं मचा सिरपाःया विषययात कयाः जानकारी बियादीगु खः ।

ज्याझ्वलय् मचा सिरपाःया नितिं आर्थिक ग्वाहालि बियादीपिं दातापिन्त सुभाय् पौ लःल्हायेगु ज्याझ्वः नं जूगु खः । उगु सुभाय् पौ मूपाहाँ वाङमय शताब्दी पुरुष डा. जोशीं लःल्हानादीगु खःसा सभानायः सुनिलकुमार शाक्यं खादा न्ययेकादीगु खः ।

ज्याझ्वलय् एनआरएनया एसिया प्यासिफिकया उपाध्यक्ष गोविन्द श्रेष्ठलिसें एनआरएनया ग्लोबल न्वकू भवन भट्टपिन्सं नुगःखँ तयादीगु खःसा मचा सिरपाःयात कयाः नेवाः न्ह्यलुवाःपिं लक्ष्मीदास मानन्धर, मल्ल के. सुन्दर, शाक्य सुरेनपिन्सं नुगः खँ तयादीगु खःसा अन्तर्राष्ट्रिय विशेषज्ञ डा. ज्योतिप्रभा तुलाधरं नं थःगु नुगःखँ तयादीगु खः ।

अथेहे, जापानं झायादीम्ह नेवाः म्ह्याय् मचा इन्दिरा सुजुकी राजभण्डारीं नं थःगु नुगःखँ तयादीगु खःसा थीथी देसं झायादीपिं रजनी प्रधान, सकिला राजभण्डारीपिन्सं नं नुगः खँ तयादीगु खः ।

नांजाःम्ह म्येहालामि पवित्र कसाः नं जनकवि दुर्गालाल श्रेष्ठया च्वसां पिज्वःगु छपू म्ये हालाः न्यंकादीगु खःसा ज्याझ्वलय् कलाकार भोगेन्द्र मानन्धरं कालभैरव प्याखं न्ह्यब्वःगु खःसा लाखे प्याखं नं न्ह्यब्वःगु खः । अथेहे, किलाघः सांस्कृतिक पुचःपाखें मंगल धून, धिमे ब्वज्या व बाँसुरी ब्वज्या यानाः सांगितिक लकस ब्वलंकाब्यूगु खः ।

मूपाहाँ डा. जोशीं नेपालभाषा मचा सिरपाःयात कयाः च्वछायादीगु खःसा सिरपाः नीस्वनेगु नितिं पलाः न्ह्याकादीपिं दिपक तुलाधर व सुनिलकुमार शाक्यया पलाः सुथां लायेमा धकाः भिंतुना देछानादीगु खःसा सभानायः सुनिलकुमार शाक्यं सुभाय् देछाःसें ज्याझ्वः क्वचायेकादीगु खः ।

ज्याझ्वलय् गैर आवासीय नेपाःमिपिन्त लसकुस यायेगु ज्या जूगु खःसा उगु हे लसकुस यायेगु ज्याझ्वःया दथुइ विशेष ज्याझ्वः कथं नेपालभाषा मचा सिरपाःया घोषणा जूगु खः ।

ज्याझ्वलय् आपालं गैर आवासीय नेपाःमिपिनिगु उपस्थिति दूगु खःसा आपालं नेवाः ख्यःया थीथी व्यक्तित्वपिनिगु उपस्थिति दूगु खः ।

ज्याझ्वलय् आःतकया दुने १४ लख तका दां दातापिनिगु पाखें दुतिने धुंकूगु व अझ नं दातापिं वयाच्वंगु जानकारी नं ब्यूगु खः ।

ज्याझ्वः ललेन्द्र शाक्यं न्ह्याकादीगु खः ।

(थन क्लीक यानाः भिडियो स्वयादिसँ)

Categorized in नेवाः