nepal life

‘नेपालभाषाया चिनाखँ स्तरीय व हलिमय् हे च्वन्ह्याये फइ’ –विला सेनेबर्ग

नेवा: अनलाइन न्युज – विजयरत्न | २०७४ माघ २५, बिहिबार १३:५२:५८

अमेरिकी कविलिसे चिनाखँ मुँज्या व अन्तरक्रिया 

नेपालभाषा परिषदया ग्वसालय् चिनाखँ दुने दइगु तत्व व उकिया प्रभावकारितायात कया अन्तरक्रिया नापनापं चिनाखँ ब्वनेगु ज्याः जूगु दु ।

नेपालभाषा परिषदया इनापय् झायादीम्ह अमेरिकी कवयित्री विला सेनेबर्गया मूपाहाँसुइ परिषदया नायः सुवर्ण शाक्यया नायःसुइ ज्याझ्वः क्वचाःगु खः ।

प्रतिसरा सायमिं न्ह्याकादीगु उगु ज्याझ्वलय् चिनाखँया संरचनायात कया च्वमिपिनिगु दथुइ सहलह तकं जूगु खः ।

ज्याझ्वलय् कवयित्री सेनेबर्गं चिनाखँया थासा व सम्प्रेषणया खँय् न्वःवानादिसें चिनाखँया प्रभावकारितायात ध्यानय् तया अनुभूतिया खँ न्ह्यब्वयेगु इलय् कविपिं सचेत जुइमाःगु बिचाः प्वंकादीगु खः ।

भाय् हिलातःगु चिनाखँ स्वयेधुंकाः नेपालभाषाया चिनाखँ स्तरीय जूगु व हलिमय् हे च्वन्ह्याये फइगु खँ अमेरिकी कवयित्री सेनेबर्गं कनादीगु खः ।

ज्याझ्वलय् कवयित्री विला सेनेबर्गया लिसें कविपिं योगेन्द्र प्रधान, वंशी श्रेष्ठ, केशवमान शाक्य, नविन चित्रकार, पुष्परत्न तुलाधर, प्रतिसरा सायमि, सुदन खुसः, सुलोचना मानन्धर, पुष्पराज राजकर्णिकार, श्रीराम श्रेष्ठ, सुधीर ख्वबि, रजनी मिला, शाक्य सुरेन, भगतदास श्रेष्ठ व नारद बज्राचायपिन्सं थःथःगु चिनाखँ ब्वनाः न्यंकादीगु खः ।

Categorized in कला