nepal life

‘दुर्गालालया सः व दुर्गालालया हस्ताक्षर’ डिभिडि चाः पिदनीगु

नेवा: अनलाइन न्युज – ललेन्द्र शाक्य | २०७४ मङ्सिर १६, शनिबार ०९:०२:३१

नापं लोककवि जकःमिया ६० क्वःगु बुदिं तःजिक न्यायेकीगु

प्रतिभा साहित्यिक परिवार व जकःमि हःपाः दबूया मंकाः ग्वसालय् झी जनकवि दुर्गालाल श्रेष्ठया कविताया डिभिडि चाः ‘दुर्गालालया सः व दुर्गालालया हस्ताक्षर’ पिदनीगु जूगु दु ।

ने.सं. ११३८ थिंलागा पारु (मंसीर १८ गते) सोमवाः सुथसिया ७ ता इलय् किपूया अमल्सिइ च्वंगु जकःमिया छेँ तुयु लुमन्ति दबूया हलय् उगु डिभिडि चाः ‘दुर्गालालया सः व दुर्गालालया हस्ताक्षर’ चिखिफ्यने ज्याझ्वः जुइगु जानकारी ग्वसाः खलः प्रतिभा साहित्यिक परिवारया नायः ज्ञानबहादुर महर्जन ‘नेवाः’जुं बियादीगु दु ।

नायः भाजु नेवाः नं धयादी, “झी जनकविथें जाःम्ह व्यक्तित्वया उसाँय् थौंकन्हय् झन् झन् स्यनाः वनाच्वंगु दु, वय्कःया कविता वाचनया सः जुगौंजुगतक हलिं न्यंकया मनूतसें व कन्हय्या पुस्तां नं न्यनेखनेमा धैगु आज्जुं थुकथं डिभिडि चाः पिथनेत्यनागु खः । थ्व छगू जनकवि दुर्गालाल श्रेष्ठयात जिमिगु सम्मान खः ।”

पिदनेत्यंगु डिभिडि चाः ‘दुर्गालालया सः व दुर्गालालया हस्ताक्षर’या नितिं छायांकन व सम्पादनया सकतां भालाः नांजाःम्ह संगीतकःमि पवित्र कसाःजुं कयादीगु खः । थ्यंमथ्यं दच्छि ई बिकाः पिदनेत्यंगु डिभिडि चाः ‘दुर्गालालया सः व दुर्गालालया हस्ताक्षर’या मू निसः व न्यय्तका (२५०/–) तका तयातःगु दुसा विदेशया नितिं ५ डलर मू तयातःगु दु । थुगु डिभिडि चाः दुने निचाः डिभिडि चाः दइगु जानकारी नं प्रतिभा साहित्यिक परिवारया नायः ज्ञानबहादुर महर्जन ‘नेवाः’जुं बियादीगु दु ।

Image result for rajbhai jakaami

उगु डिभिडि चाः ‘दुर्गालालया सः व दुर्गालालया हस्ताक्षर’ पितब्वज्या ज्याझ्वलय् लोककवि राजभाई जकःमिया ६० दँ बुदिं हनेगु ज्याझ्वः नं तयातःगु दु । थुगु विषयस भाजु जकःमिं धयादी, “पासापिन्सं थुगु हे ज्याझ्वलय् थःगु ख्वीदँ बुदिं हनेत इनाप यानादिल, वहे कथं झी जनकविया डिभिडि पितब्वज्या ज्याझ्वलय् थःगु बुदिं नं हनेत्यनागु खः ।”

लोककवि जकःमि ग्वसाः खलः प्रतिभा साहित्यिक परिवार व जकःमि हःपाः दबूया मू संरक्षक व संस्थापक नं खःसा वय्कलं हे उगु डिभिडि चाः पिथनेगु नितिं आर्थिक पक्षया भाला कुबियादीगु खः ।

Categorized in नेवाः