nepal life

‘ज्वभनया रंग’ प्रेम महर्जनं उलाबिल

नेवा: अनलाइन न्युज – ललेन्द्र शाक्य | २०७४ मङ्सिर १७, आइतबार १७:१८:०६

नेपाःया नांजाःम्ह संगीतकार मनराजा नकःमिया याकः लसय् पिदंगु म्येचाः ‘ज्वभनया रंग’ ज्यापु समाज यलया नायः प्रेम महर्जनया मूपाहाँसुइ उलेज्या जूगु दु ।

यःमरी पुन्हीया दिं थौं आइतवाः यलया लगनख्यलय् च्वंगु ललितपुर मलया कःसिइ च्वंगु हलय् जूगु उगु ज्याझ्वः मूपाहाँ ज्यापु समाज यलया नायः महर्जनं सुकुन्दा च्याकाः उलेज्या यानादीगु खः ।

म्येचाः ‘ज्वभनया रंग’ उलेज्या ज्याझ्वलय् मूपाहाँ महर्जनलिसें दबुली च्वनादीपिं सकलसिनं म्येचाः सार्वजनिक यानादीगु खः ।

ज्याझ्वलय् संगीत संयोजक व रिकर्डिष्ट हरिशरण साय्मिं पिदंगु म्येचाःया विषयस न्वःवानादीगु खःसा गायक जुजुकाजी रंजित, संगीतकार जुगल डंगोल, बरिष्ठ सिनेपत्रकार विजयरत्न असंबरे, गायक स्वयम्भुरत्न शाक्यपिन्सं भिंतुना न्वचू बियादीगु खः ।

ज्याझ्वलय् म्येहालामि, म्येच्वमिपिन्त सार्वजनिक जूगु म्येचाः ‘ज्वभनया रंग’ मूपाहाँ ज्यापु समाज यलया नायः प्रेम महर्जनं लःल्हानादीगु खःसा म्येचाः मीपिन्त नं म्येचाः देछाःगु खः ।

ज्याझ्वःया सभानायः मंगल महर्जनं सुभाय् न्वचू व सभा विसर्जन यानादीगु उगु ज्याझ्वलय् दीपिका बलामि, सरीता शाहहीपिन्सं म्येचाः ‘ज्वभनया रंग’ दुनेया म्ये हालाः न्यंकादीगु खः ।

संगीतकार मनराजा नकःमिया याकः म्येचाःत मिखाया अजलं, तयजु, नानु, सिमाकचा, निर्मल मन, छ्यनय् तकुस्वां व आः नकतिनि सार्वजनिक जूगु ज्वभनया रंग यानाः ९ गू याकः म्येचाः पिदने धुंकल ।

अथेहे, खस भासं लेखेर तिम्रो नाम, चोखोमाया, खेल्दै गर्दा, प्रेमल, पहिलो किरण, कृति, दुनियाँ, महसुस, कलाकार, मञ्जरी यानाः १० चाः म्येचाः पिदनेधुंकल ।

अथेहे, संकिपा ख्यलय् संगीतकार मनराजा नकःमिं नेपालभाषाया संकिपा शंकरा, तारेमाम, कुलंगार, व मिखा, याःहू, अजः मिखाय् संगीत तयादीधुंकलसा खस भाय्या संकिपा एकदिन एकरात, लाखेभाजु संकिपाय् संगीत तयादीधुंकलसा वय्कः रेडियो नेपालया मू संगीत संयोजक खः ।

Categorized in कला