nepal life

‘कार्यकर्ता त्वःतकेत विज्ञप्ति पिकयागु मदु’ –राज्यमन्त्री पुन

नेवा: अनलाइन न्युज | २०७४ कार्तिक २८, मंगलबार ११:२२:१०

सिँचाइ राज्यमन्त्री अमरसिंह पुनं रोल्पापाखें गिरफ्तारीइ लाःपिं विप्लव नेतृत्वया नेपाल कम्युनिष्ट पार्टीया कार्यकर्ता त्वःतकेगु नितिं विज्ञप्ति पिथनेगु ज्या मयानागु स्पष्ट यानादीगु दु ।

मन्त्री पुनं उगु खँ रोल्पाया लिवाङय् सोमवाः सनिलय् ग्वसाः ग्वःगु पत्रकार सम्मेलनय् धयादीगु खः ।

पूर्वप्रधानमन्त्री व नेकपा माओवादी केन्द्रया नायः पुष्पकमल दाहाल प्रचण्डं थःगु हे नां तोकेयानाः ल्वाभःलिसें ज्वंपिं विप्लव नेतृत्वया कार्यकर्ता त्वःतकेत विज्ञप्ति पिथंगु धैगु थीथी संचारमाध्यमय् मखूगु प्रचार याःगु राज्यमन्त्री पुनं द्वपं बियादिल ।

संवैधानिक अधिकार छ्यलाः स्वतन्त्रतापूर्वक राजनीतिक गतिविधि यायेदइगु अधिकार धाःसा सुनानं हनन यायेमदइगु मन्त्री पुनं स्पष्ट यानादिल ।

नागरिकयात निर्वाचनय् ब्वति कायेगु व बहिष्कार यायेगु निगुलिं अधिकार दूगुलिं बहिष्कारया नितिं शान्तिपूर्ण प्रचारप्रसार याःगुलि गिरफ्तार यायेमज्यूगु पुनं स्पष्ट यानादिल ।

उम्मेदवारपिन्त लक्षित यानाः बम मुइकेगु कथं विध्वंसात्मक गतिविधि याइपिन्त धाःसा कानूनी दायराय् हयेमाःगु विचाः मन्त्री पुनं प्वंकादिल ।

रोल्पाय् निर्वाचन आचारसंहिता उल्लंघनया घटना व्यापक रुपं अप्वयाच्वंगु जुयाः उकिया सत्यतथ्य सिइकाः संचारमाध्यमपाखें सार्वजनिक यायेत नं पत्रकारपिन्त मन्त्री पुनं आग्रह यानादिल ।

Categorized in राजनीति