–समीर महर्जन

डायमण्ड ब्यापारी, अमेरिका

(समीर महर्जन, आर.बि. डायमण्ड अमेरिकाया प्रमुख डायमण्ड ब्यापारी, न्यूयोर्क नेवाः गुथिया नायः नापं जनजाति महा सघ अमेरिकाया निवर्तमान उपाध्यक्ष खः । वय्कःलिसे वय्कःया व्यक्तिगत व आः अमेरिकाय् जुइत्यंगु वर्ल्ड नेवाः अर्गनाइजेशनया निक्वःगु अधिवेशनया विषययात कयाः गंगाबहादुर नेम्कुलं यानादीगु बःचाधंगु खँल्हाबल्हा थन न्ह्यब्वयाच्वना । –सं.)

छि छम्ह ब्यापारी जुयानं जनजाति व नेवाःतय्गु निमित्त अमेरिकाय् ज्या यानाः वयाच्वनादीगु दु । ईयात गुकथं छ्यलाः दियाच्वनागु दु ?

ई छ्यलेत ला तसकं थाकु, तर जिं नेवाः भाषा, तजिलजिया नितिं ई मिले यानाच्वनागु दु ।

अमेरिकाया छि छम्ह ब्यापारी, ब्यापारी जुयाः नेपालभाषा, नेवाः संस्कृति परम्परालिसें जनजातिया नितिं ज्या यायेबलय् गैर नेवाः पासापिन्सं विरोध यायेगु ज्या मयाःला ?

मजू, मजू, झीसं खँ ल्हायेबलय् खःगु खँ, सहीरुपं क्षेत्री बाहुन यानि कि गैर नेवाःपिन्सं नं थुइक स्पष्ट यायेगु यानाः वयाच्वनागु दु । बास्तविक जुल धाःसा वय्कःपिन्सं नं साथ ब्यू । छकः निकः बुझे मजुयाः छम्ह निम्ह पासापिं नाप समस्या नं वःगु दु । अले जि छम्ह ब्यापारी जूगुलिं ब्यापारया सिलसिलाय् ब्यापार व भाषा, जनजातिया ज्या फरक फरक इलय् फरक फरक थासय् मिले यानाः यायेगु जुया थ्व समस्या कम व हाकनं जि ज्वेलरीया ब्यापारी, ब्यापारया झ्वलय् फुक्कलिसे मन मिले जुयाः च्वनागु दु ।

आः वर्ल्ड नेवाः अर्गनाइजेशनया निक्वःगु अधिबेशन अमेरिकाय् जुइत्यंगु दु । थुुगु अधिवेशनय् छिगुपाखें गुज्वःगु ग्वाहालि जुइ ?

वर्ल्ड नेवाः अर्गनाइजेशन अमेरिका व विश्वःया नेवाःतय्त मदयेकं मगाःगु संस्था खः । त्रिभुवन तुलाधर, डा. बालगोपाल श्रेष्ठ, दयारत्न शाक्य, सिजन श्रेष्ठनापं विश्वन्यंक च्वंपिं नेवाःतय्गु ग्वाहालिं थुगु संस्था पलिस्था जुल । न्हापांगु अधिवेशन लण्डनय् बांलाक्क हे क्वचाल । अवश्य नं निक्वःगु अधिवेशन अमेरिकाया बाल्टीमोरय् जुइत्यंगु दु । थ्व ज्याझ्वःयात कयाः धायेगु खःसा, जि व्यक्तिगत रुपं तसकं हे लय्तायागु दु । तर नं वर्ल्ड नेवाः अर्गनाइजेशनया ज्याझ्वःया बारे स्पष्ट धारणा वये लिपा लाःगु ला, ज्याझ्वःया बारे जानकारी बिइत छुं कन्ज्यूस्याइँ याःगु ला धयाथें महसूस जुयाच्वंगु दु । जि अमेरिकाय् च्वंम्ह पासा सिजन जुयात बारम्बार धयाच्वनागु दु कि झीपिं निष्पक्ष व खुल्ला जुइमाल । अर्गनाइजेशन व अधिवेशन अले नेवाःतय्गु नितिं खुल्ला जुइमाल लिसें झी नेवाःत छधी छप्पं जुइमाल धकाः ।

समीर जु, छिसं नेवाःत छधी छप्पं जुइमाल व वर्ल्ड नेवाः अर्गनाइजेशन खुल्ला जुइमाल धकाः धयादिल । आः छिगु विचाः न्यने, खुल्ला जुइत छु छु यायेमाःथें च्वं ले ?

खुल्लाया मतलब, फुक्क नेवाः संघसंस्थानाप सहलह जुइमाल । नेपालभाषा ख्यः व नेवाः समुदायपिनिगु नितिं थ्व तसकं े गौरबया खँ खः कि अमेरिकाय् निक्वःगु अधिवेशन जुइगु धयागु । थुगु ज्याझ्वलय् ब्वति काः वइपिं थीथी देसं वइपिं नेवाःत व नेपालं वइपिं झी नेवाः दाजुकिजा, तःकेहेँपिन्त नये–त्वनेगु व च्वनेगु नितिं ब्यवस्था अमेरिकाय् च्वनाच्वंपिं झी नेवाःतय्सं हे यायेमाल ।

छिसं अधिवेशनय् ब्वति काःवइपिं थीथी देय्या नेवाःत व नेपालं वइपिं नेवाःतय्त नये–त्वनेगु व च्वनेगु नितिं अमेरिकाय् च्वंपिं नेवाःतय्सं ब्यवस्था यायेमाः धकाः धयादिल । छम्ह छिं अमेरिकाय् च्वनादीम्ह नेवाः खः, छिगुपाखें गुज्वःगु ग्वाहालि जुइ ?

अधिवेशनय् ब्वति काः वइपिं देसं देय्या नेवाःतय्त अमेरिकाय् च्वंपिं छम्ह नेवाः नं निम्ह या निम्हं अप्वःसित थःथःगु छेँय् तयेगु ब्यवस्था यायेमाः । थ्व थःगु क्षमता कथं खः । फुपिन्सं प्यम्ह न्याम्ह, मफुपिन्सं निम्ह जक थःगु छेँय् तयेगु ब्यवस्था यात धाःसां नं तःधंगु ग्वाहालि जुइथें जिं तायेकाःगु दु । थुगु विषयस जिं फूगु ग्वाहालि यायेगु नुगलय् तयागु दु ।

समीर जु, दकले लिपा, नेवाः ख्यःया विकास यायेगु नितिं छिगु विचाः गुज्वःगु कथंया दुथें ?

नेवाः ख्यः विकासया नितिं झीसं यायेगु ज्यात आपालं आपाः ल्यंदनि । दकले न्हापां ला झी नेवाःत आर्थिक रुपं सक्षम जुइमाल । नापं सरकारी तवरं लिसें राजनीतिक ख्यलय् पहुँच न दयेमाल । अले झी नेवाःत छधी छप्पं जुइमाल । अले सकल नेवाःपिन्त उचित शिक्षादीक्षाया व्यवस्था यायेमाल । थुलि खँय् नेवाः न्ह्यलुवाःपिन्सं विचाः यानाः पलाः छित धाःसा जिं खनागु अवश्य नं नेवाः ख्यः विकास जुइथें च्वं ।