nepal life

८४ म्ह मिसा अनिवार्य यासें निर्वाचन आयोगं समानुपातिक दलं काःगु सिट क्वःछित

नेवा: अनलाइन न्युज | २०७४ माघ २६, शुक्रबार १७:५८:०६

निर्वाचन आयोगं प्रतिनिधिसभाया समानुपातिक पद्धतिपाखें दलतसें काःगु सिट ल्याः क्वःछ्यूगु दु । आयोगं थःपिन्सं काःगु सिटय् गुलि मिसा प्रतिनिधित्व अनिवार्य जुइमाः धैगु तकं क्वःछिनाः दलतय्त पौ छ्वःगु दु ।

प्रतिनिधिसभाया समानुपातिकय् भाग काःगु ४९ दलमध्ये ५ गू दलं जक सिट काःगु दु । आयोगया कथं दकले अप्वः मत एमालें ३१ लख ७३ हजार ४९४ अर्थात् ३३.२५ प्रतिशत काःगु दुसा दकले म्हो हाम्रो पार्टीं ४२६ मत काःगु दु ।

३ प्रतिशत वा वसिबें अप्वः मत काःगु दलं जक समानुपातिक सिट कायेखनीगु संवैधानिक व्यवस्था दु । वकथं समानुपातिकया ११० सिटमध्य एमालें ४१, कांग्रेसं ४०, माओवादी केन्द्र १७, राजपा व फोरम ६–६ सिट काःगु दु ।

८४ म्ह मिसा अनिवार्य

संविधानया धारा ८४ या उपधारा ८ स संघीय संसदय् प्रतिनिधित्व याइगु दलयात निर्वाचित मुक्कं दुजः ल्याःया कम्ती नं १ तिहाइ दुजः मिसा जुइमाःगु ब्यवस्था दु । प्रत्यक्ष व राष्ट्रियसभा दुजःतपाखें उगु पूमवंसा समानुपातिकपाखें पूर्ति यायेमाः ।

आयोगया कथं एमालें ३७, कांग्रेसं २०, माओवादीं १६, राजपां ६ व फोरमं ५ म्ह मिसा प्रतिनिधित्व सुनिश्चित यायेमाः । थथे यायेबलय् एमालें ४, कांग्रेसं २०, माओवादी व फोरमं १–१ म्ह मिजंयात जक समानुपातिक सांसद दयेके फइगु जूगु दु । राजपां धाःसा फुक्क मिसा जक छ्वयेमालीगु जूगु दु ।

आयोगं माघ २९ गते दुने विजयी याइपिं सांसदपिनिगु नां लःल्हायेत दलतय्त आग्रह याःगु दु ।

Categorized in राष्ट्रिय