bima1

३४९ दँ पुलांगु यलया फल्चा पुनर्निर्माण लिपा समुदाययात लःल्हात

नेवा: अनलाइन न्युज – राकेश महर्जन | २०७३ चैत्र १०, बिहिबार २३:४१:१०

वंगु तःभुखाचं क्षतिग्रस्त यल लुँछेँननि, चाबहाःया ३४९ दँ पुलांगु फल्चा एस.ए.आई हेल्प नेपाल मार्फत हाम्बुर्गया मोर फाउण्डेशनया आर्थिक ग्वाहालिइ पुनर्निर्माण जूगु दु । पुनर्निर्माण लिपा उगु फल्चायात समुदाययात हे लःल्हाःगु दु । जर्मनीया हाइडेलबर्ग विश्वविद्यालय अन्तर्गत एस.ए.आई हेल्प नेपालया प्रतिनिधि डा. क्रिष्टियाना ब्रोसिउसं यलया चाबहाः मंकाः खलःया नायः श्याम गोपाल महर्जनयात बिहीवाः छगू ज्याझ्वः यासें फल्चा लःल्हानादीगु खः ।

ज्याझ्वलय् न्ववानादिसें डा. ब्रोसिउसं फल्चाया संरक्षण मार्फत भजन संस्कृतिया नं संरक्षण यायेमाःगु खँय् बः बियादिल ।

हाइडेलबर्ग विश्वविद्यालयया डा. एक्सल मिखाइल्सं मस्त–ज्याथ, मिसा–मिजंलिसें स्वदेसी व विदेशीतय्त नं थाय् बीगु फल्चाया खुल्ला स्वरूपयात संरक्षण यायेमाःगु धासें थुज्वःगु संरचनायात खुल्ला हे यानातयेमाःगु बिचाः तयादिल । 

चाबहाः मंकाः खलःया नायः महर्जनं फल्चाया संरक्षण व सम्बद्र्धनया भाला समुदायं काइगु बचं बियादिल । आर्किटेक्ट पद्मसुन्दर महर्जनं फल्चा दयेकेगु प्रकृयाया बारे जानकारी बियादिल ।