nepal life

२४ क्वःगु क्यान मेला येँय् न्ह्यानाच्वन, फागुनं ८ क्वःगु मेला पोखराय्

नेवा: अनलाइन न्युज | २०७४ माघ १३, शनिबार ०९:५९:५७

थौंकन्हय् येँया भृकुटी मण्डपय् २४ क्वःगु सुविसु क्यान इन्फोटेक मेला जुयाच्वंगु दु । आः जुयाच्वंगु मेला वंगु माघ ११ गतेनिसें न्ह्याःगु खःसा माघ १६ गते क्वचाइगु जूगु दु ।

कम्प्युटर एसोसिएसन नेपाल (क्यान) महासंघया ग्वसालय् जूगु उगु मेला धुंकाः पोखरा कास्कीइ नं च्याक्वःगु क्यान इन्फोटेक मेला जुइगु जूगु दु ।

कम्प्युटर एसोसिएसन नेपाल (क्यान) महासंघ कास्कीं वइगु फागुन ४ निसें ८ गतेतक उगु च्याक्वःगु क्यान इन्फोटेक मेला यायेगु जानकारी ब्यूगु खः ।

पोखराया नयाँबजारय् च्वंगु प्रदर्शनी केन्द्रय् ग्वसाः ग्वइगु उगु मेलाय् कम्प्युटर व सूचना प्रविधि सम्बन्धय् दूगु अत्याधुनिक व नवीनतम प्रविधिया बारे जानकारी बिइगु क्यान कास्कीया नायः युवराज पौडेलं शुक्रवाः पत्रकार सम्मेलनय् धयादीगु खः ।

मेलाय् बृहत् सूचना प्रविधि व उगु क्षेत्रय् स्थानीयस्तरय् याःगु उत्पादनया प्रदर्शनी, आइसिटी कन्फरेन्स, प्रदेशस्तरया टाइपिङ कासा, सूचना प्रविधि हाजिरीजवाफ, कम्प्युटर व ल्यापटपया निःशुल्क मर्मत सेवा ज्याझ्वः जुइगु जानकारी पत्रकार सम्मेलनय् ब्यूगु दु ।

सूचना प्रविधिलिसे सम्बन्धित १२० कक्ष दइगु मेलाय् नवीनतम प्रविधिया मोबाइलया प्रदर्शनी व मिइगु ज्या नं जुइगु जानकारी उगु पत्रकार सम्मेलनय् ब्यूगु खः ।

मेलाया तयारी यायेत नायः पौडेलया संयोजकत्वय् २७ गू उपसमिति नीस्वंगु दु ।

Categorized in बजाः