nepal life

११ दँ लिपा थिमिइ मेय् प्वाः खनेगु जात्रा

नेवा: अनलाइन न्युज | २०७४ भाद्र २३, शुक्रबार १०:२५:०८

मध्यपुर थिमिइ ११ दँलिपा मेय् प्वाः खनेगु जात्रा न्यायेकूगु दु । येँयाः इन्द्रजात्राया कन्हय् कुन्हु मध्यपुर थिमिइ मेय् प्वाः खनाः न्यायेकीगु येँयाः पुन्हीया मेय् प्वाः खनेगु जात्रा स्थानीय युवापिनिगु पहलय् न्यायेकूगु खः ।

मध्यपुर थिमि नगरपालिका वडा ल्याः ५ या वीरेन्द्रभक्त गजु श्रेष्ठं मेय् प्वाः खनाः उगु जात्रायात लोप जुइगुपाखें जोगे यानादीगु खः । दँय् दसं भाद्र शुक्ल पुन्हीया दिं बहनी जात्रा न्यायेकीगु प्रचलन कथं थिमिया हे दिगु त्वालय् च्वंगु दिगुभैरब देगः न्ह्यःनेया दबुली नतु अर्थात् सुइरों मेय् प्वाः खंगु खः ।

Image may contain: 1 person

समितिया नायः चन्द्रकृष्ण श्रेष्ठं पौराणिक धापू कथं परापूर्वकालय् थिमिया स्थानीय बासिन्दापिन्त भूतप्रेत, ख्याःथें जाःपिं राक्षसपाखें पीडित जुइधुंकाः थिमिया जनतायात दुःखपाखें मुक्त याकेत थिमिया आराध्य द्यः बालकुमारीया साधना यायेधुंकाः भाद्र शुक्ल पुन्हीया दिं छम्ह मनूयात नतुचां मेय् प्वाः खनाः नगर परिक्रमा याकेधुंकाः भूतप्रेत व राक्षस उगु थासय् उज्वःपिं साहसिक मनू दूगु धासें बिस्युं वंगु जनश्रुति दूगु धयादीगु दु ।

मेय् प्वाः खनीगु दिंयात द्यः दुसालेगु धायेगु यानावयाच्वंगु दुसा उगु दिं बालकुमारी देगलय् ११ गः किसलिं व ह्याउँम्ह ग्वंगःया बली बियाः बालकुमारी द्यःया साधना यायेमाःगु प्रचलन दु ।

Image may contain: 2 people, people sitting, food and indoor

आर्थिक व थीथी हुनिं लोपोन्मुख अवस्थाय् थ्यनेधुंकाः स्थानीय युवापिन्सं उकियात ल्यंकातयेत जात्रा संचालन याःगु खः । जात्रायात व्यवस्थित व मर्यादित ढंगं संचालन यायेत येँयाःपुन्हीया मेय् प्वाः खनेगु जात्रा व्यवस्थापन समिति नीस्वनाः मध्यपुर थिमि नगरबासी व थीथी सामाजिक संघसंस्थापिनिगु ग्वाहालिं जात्रा संचालन जूगु खः ।

समितिया नायः श्रेष्ठं मेय् प्वाः खनेगु जात्राया नितिं थ्यंमथ्यं लच्छि न्ह्यःनिसें हे तयारी यानागु खँ कनादीगु दु । मेय् प्वाः खनेगु नतुचा दयेकेगु नितिं थ्यंमथ्यं लच्छि न्ह्यः नतु दयेकीम्ह नकःमियात खबर यायेमाःगु परम्परा दु । नतु दयेकेत खबर याः वनेबलय् ह्याउँम्ह ग्वंगः, समेबजिलिसें नकःमिया छेँय् वनीगु व नकःमिं नतु दयेकेधुंकाः स्ववाःतक शुद्ध तूचिकनय् नतुयात डुबेयानाः तयेमाःगु प्रचलन दूगु वय्कलं धयादिल । वय्कलं जात्राया नितिं त्रिशूलथें जाःगु स्वंगू तीर दूगु नतु दयेकागु जानकारी बियादिल ।

Image may contain: 2 people, hat and text

मेय् प्वाः खनेगु जात्राया प्यन्हु न्ह्यः थिमिया लायकूया पःमाःपिन्सं हनुमानध्वाखा दरबारय् वनाः राज खड्ग ज्वनाः जात्राय् दबुली तयेमाःगु प्रचलन दूगु जानकारी बियादिसें समितिया नायः श्रेष्ठं येँयाः इन्द्रजात्राया दिं बालकुमारीइ छ्वय्ला भू, ह्याउँम्ह ग्वंगःया बलीलिसेंया पूजा यानाः भ्वय् नकेमाःगु प्रचलन दूगु धयादिल । उकिया कन्हय् कुन्हु येँयाःपुन्हीया दिनय् दुता नं जामा फिनाः बालकुमारीइ पूजा यायेमाःगु परम्परा दु ।

Image may contain: 1 person, sitting and outdoor

उगु दिं मेय् प्वाः खनीम्ह व्यक्ति मौनव्रत च्वनेमाः । मेय् प्वाः खनेगु दिं हे सनिलय् बालकुमारीनिसें दिगु भैरवतकया थासय् मत ब्यू वनेगु याइ । अनं वयेधुंकाः दिगु भैरव देगलय् गुरु जामनः थरया मनूया उपस्थितिइ भैरवया पूजा यायेगु याइ । उगु पूजा लिपा मेय् प्वाः खनीम्ह व्यक्तियाके दैवीशक्ति प्राप्त जुइगु जनविश्वास दु ।

Image may contain: 2 people, people standing

(थौं ने.सं. ११३७ भाद्र २३ गते नेपाल समाचारपत्र न्हिपती पिदंगु बुखँ)

Categorized in पत्रपत्रिका