nepal life

ह्याउँनिभाःया आव्हान ः नेवाः मुद्दाय् प्रतिबद्धपिन्त भोट बीत

नेवा: अनलाइन न्युज | २०७४ कार्तिक २२, बुधबार ११:०९:१५

ह्याउँनिभाः पुचलं न्ह्यःने वयाच्वंगु प्रतिनिधिसभा व प्रदेशसभा निर्वाचनय् नेवाः प्रदेश सुनिश्चितताया ग्यारेन्टी बीम्ह उम्मेदवारयात हे भोट बीत आव्हान याःगु दु ।

येँय् मंगलवाः संचारकःमिपिंलिसे अन्तक्र्रिया ज्याझ्वःया ग्वसाः ग्वसें ह्याउँनिभाः पुचलं मतदातापिन्सं नेवाः राज्य स्थापनाया खँय् प्रतिवद्ध लिसें सडक विस्तारं पीडित आम नेवाःया घालय् मल्हम तयेकेफुम्ह उम्मेदवार ल्ययेत आव्हान याःगु खः ।

अन्तक्र्रिया ज्याझ्वलय् नुगःखँ तयेगु झ्वलय् पुचःया कजि राकेश मास्कें थुगु खँत न्ह्यःने तसें नेवाःतय्सं मतदान यायेगु झ्वलय् थःम्हं ल्ययेम्ह उम्मेदवार नेवाःतय्गु आर्थिक व सामाजिक विकास यायेगुलिइ प्रतिवद्ध खः कि मखु धइगु खँयात ध्यानय् तयेत नं इनाप यानादिल । लिसें कजि मास्कें पृथ्वीनारायण शाहं नेपाःया एकिकरण याःगु मखसें छलकपट यानाः स्वनिगःया अतिक्रमण जक याःगु खः धइगु खँ न्ह्यःने वयेधुंकूगु अवस्थाय् थुकियात गोरखा राज्यया विस्तार जक धायेफइगु बिचाः तयादिल ।

अथेहे ह्याउँनिभाः पुचःया पूर्व नायः अनुप सिं सुवालं नेवाःतय् दथुइ आर्थिक क्रान्ति यायेगु हे पुचःया मू आज्जु खःगु धयादिल । लिसें पूर्व नायः सुवालं आः याकनं हे नेवाः चेम्बर अफ कमर्श एन्ड प्रोफेशनल नीस्वनेगु तयारीइ पुचलं पलाः छिनाच्वंगु जानकारी नं बियादिल ।

संचारकःमिपिनिगु न्ह्यसःया लिसः ब्युसें सुवालं नेवाः हक अधिकारया मुद्दाय् प्रतिबद्ध गुगु नं पार्टीया उम्मेदवारयात त्याकेगु लकस ब्वलंकेगु नितिं थःपिं सक्रिय जुइगु धयादिल ।

अथेहे पुचःया संस्थापक नायः मनरत्न शाक्यं व पूर्व मू छ्यान्जे यादवप्रसाद रन्जितं पुचःपाखें जुयाच्वंगु ज्याखँत व आः निर्वाचनया झ्वलय् थःपिनिगु तयारी व रणनीतिया बारे ध्वाथुइकादीगु खः ।

ने.सं.१११० य् ह्याउँनिभाः नेपालभाषा ग्वाहालि पुचःया नामं स्थापना जुयाः नेवाः साहित्य ख्यलय् सक्रिय जुयाच्वंगु संस्था थौंकन्हय् ह्याउँनिभाः पुचः नामं न्ह्यःने वयाः विशेष रुपय् नेवाः इकोनोमिक्सया मुद्दाय् केन्द्रित जुयाः थीथी ज्याझ्वःत याना वयाच्वंगु दु ।

Categorized in नेवाः