nepal life

हाकनं भाः थकाल पेट्रोलियम पदार्थय्, एलपी ग्यास नं थिके जुल

नेवा: अनलाइन न्युज | २०७४ पौष १८, मंगलबार १०:१८:५४

सरकारं पेट्रोलियम पदार्थया मू हाकनं थकाःगु दु । नेपाल आयल निगम संचालक समितिया बैठकं पेट्रोल, डिजेल, मचिकं, भुतू ज्याय् छ्यलीगु एलपी ग्यास व हवाई इन्धनया मू थकायेगु निर्णय याःगु खः ।

निगम प्रवक्ता विरेन्द्र गोइतया कथं पेट्रोल, डिजेल व मचिकनय् प्रतिलिटर छतका–छतका दां थकाःगु दु । अथेहे, भुतू ज्याय् छ्यलीगु एलपी ग्यासय् प्रतिसिलिण्डर २५ तका व हवाई इन्धन आन्तरिक पाखे प्रतिलिटर स्वतका दां थकाःगु गोइतं जानकारी ब्यूगु दु ।

न्हूगु मू कथं पेट्रोल १ लिटर आः १०२ तका थ्यंगु दु । डिजेल व मचिकंया १ लिटरया मू ७९–७९ तका थ्यंगु दु । अथेहे एलपी ग्या छगः सिलिण्डरया मू १,३७५ तका थ्यंगु दुसा हवाई इन्धन आन्तरिकय् स्वतका दां थकयाः ९० तका प्रतिलिटर थ्यंगु दु ।

न्हूगु मू कथं अन्तर्राष्ट्रिय पाखेया हवाई इन्धनय् नं प्रति ब्यारेल ५० डलर अप्वयेकाः ९०० डलर थ्यंकूगु दु ।

न्हूगु मू सोमवाः चान्हय् निसें लागू याःगु दु । मू समायोजन यायेधुंकाः निगमया मासिक घाटा म्हो जुयाः २६ करोड ४० लन तकाय् क्वाहाँ वःगु प्रवक्ता गोइतं जानकारी ब्यूगु दु ।

आ निगमयात पेट्रोलय् धाःसा लिटरया नितका व ८३ पैसा नाफा दु । तर, ग्यासय् प्रतिसिलिण्डर २०८ तका घाटा दु । डिजेलय् नं निगमयात नितका व ७१ पैसा नाफा दु ।

तराईलय् चिकंया हकय् थ्व मू सिबें प्रतिलिटर छतका व ५० पैसा व पोखरा व दाङय् ५० पैसा कम तू । दिपायल, सुर्खेत व येँया मू धाःसा छगू हे जुइगु निगमं जानकारी ब्यूगु दु ।

इन्डियन आयल कर्पोरेशनं सोमवाः न्हूगु मूल्यसूची छ्वयाः हयेधुंकाः इन्धनया मू समायोजन याःगु निगमया कार्यकारी निर्देशक सुशील भट्टराईं जानकारी ब्यूगु खः ।

Categorized in बजाः