नेवा: अनलाइन न्युज | २०७४ कार्तिक २८, मंगलबार १०:११:३७

कञ्चनपुरया उत्तरी क्षेत्र स्वानाच्वंगु गड्डचौकी–ब्रम्हादेव लँपु निर्माणय् भारतीय पक्षं पंगः थंगु दु ।

नेपाल–भारत सीमा पिलर ८०९ (५ ए) लिक्क निर्माण जुयाच्वंगु पीच लँपुइ ह्यूमपाइपया विषययात कयाः भारतीय सीमा सुरक्षा बल एसएसबीं पंगः थंगु खः ।

नेपाली भूमिइ हे निर्माण जुयाच्वंगु सतकय् भारतीय पक्षं थःगु क्षेत्र दुने लाःगु धासें ल्वाभःलिसें वःपिं एसएसबीं निर्माण जुयाच्वंगु सतकय् लः निकासया नितिं तःगु ह्यूमपाइप लिकायेमाःगु दबाब बिइधुंकाः विवाद ब्वलंगु खः ।
भारतीय पक्षया पंगःया हुनिं सतक निर्माणया ज्याहे द्यूगु स्थानीयबासीं धाःगु दु ।

सतक निर्माणय् एसएसबीं पंगः थनेधुंकाः निर्माण ज्या द्यूगु जानकारी वःगु प्रमुख जिल्ला अधिकारी कुमारबहादुर खड्कां धाःगु दु । वय्कलं धयादी, “भारतीय पक्षलिसे मंकाः सहलह यानाः निर्माण ज्या न्ह्यःने यंकेगु जुइ ।”

वंगु दँ फागुनय् कल्भर्टया विषययात कयाः जूगु विवादय् भारतीय एसएसबीं चलेयाःगु गोली कयाः कञ्चनपुरया पुनर्वास नगरपालिकाय् छम्ह नेपाःमिं ज्यान गुमेयाःगु खः ।

Categorized in राष्ट्रिय