nepal life

हवाई आक्रमणपाखें सिरियाय् ३६ म्ह मनू स्यात

नेवा: अनलाइन न्युज | २०७४ माघ २६, शुक्रबार १३:३४:१६

विद्रोहीया नियन्त्रण दूगु कथं कयातःगु सिरियाया दमास्कस लिक्क लाःगु गोटाय् जूगु हवाई आक्रमणय् लानाः ३६ म्ह मनूत सीगु दु ।

सिरियाया सरकारी पक्षया सुरक्षाकःमिं बिहिवाः याःगु आक्रमणय् लानाः सीपिनिगु ल्याः ३६ म्ह थ्यंगु अनुगमनकर्तापिन्सं जानकारी ब्यूगु खः ।

युद्धक विमानं सिरियाली विद्रोही पुचःयात लक्षित यानाः राजधानीनिसें पूर्वपाखे वंगु न्यान्हु न्ह्यःनिसें मद्दिक्क आक्रमण यानाच्वंगु खः ।

‘सिरियन अब्जरभेटरी फर ह्युमन राईटसं’ कम्ती नं खुगू थासय् हवाई आक्रमण याःगु जानकारी ब्यूगु दु ।

बिहिवाः स्याःपिं मध्ये झिम्ह मचात व न्हय्म्ह मिसात लाःगु दु । वंगु सोमवाः निसें आःतक १८५ म्ह आम नागरिक स्याःगु बेलायतय् ज्याकुथि दूगु उगु मानव अधिकारवादी संस्थाया प्रमुख रामी अब्देल रहमानं जानकारी बियादीगु खः ।

Categorized in अन्तर्राष्ट्रिय