nepal life

हर्षरत्न व लक्ष्मीप्रभा दिवस हन

नेवा: अनलाइन न्युज | २०७४ माघ १, सोमबार १७:४२:१९

उदाय् समाजं दँय्दसं न्ह्याका वयाच्वंगु हर्षरत्न लक्ष्मीप्रभा दिवस थुगुसी नं ऐतिहासिक असंया उदाय् छेंय् माघ १ गते ध्यःचाहु सन्हु कुन्हु तःजिक हनेगु याःगु दु ।

थुुगु हे ज्याझ्वलय् भुखाचं स्यंकुगु उदाय् छें न्हूधाः क्वचागु व उदाय् म्युजियमया बुसादँ न्यायेकेगु ज्याझ्वः नं जूगु दु । उदाय् समाजया नायो डा.रुपज्योति कसाःया सभापतित्वय् न्ह्याःगु उगु मँुज्याय् उदाय् छेंया थुवापिं हर्षरत्न तुलाधर व लक्ष्मीप्रभा तुलाधरपिनिगु किपातय् साहु पद्मज्योति कसाः, डा. रुपज्योति कसाः व दानरत्न तुलाधरपिन्सं स्वांमा क्वखायेका सम्मान व्यक्त यानादीगु खः ।

उगु ज्याझ्वलय् उदाय् समाजया न्वकु डा. प्रेमरत्न स्थापितं लसकुस न्वचु बियादीगु खः । थुकथं हे दिवस हना बारे उदाय् समाजया छ्याञ्जे अमरकाजी तुलाधरं उदाय् समाजयाया थीथी पक्षयात कयाः धारणा प्वंकादीगु दु । थुकथं हे ज्याझवलय् उदाय् छें न्हूधाः क्वचागुया प्रतिवेदन उदाय् समाजया मूदुजः ई. धर्मरत्न कसालं न्ह्योब्वयादीगु दु ।

अथेहे उदाय् म्युजियमयात कयाः म्युजियमया सल्लाहकार मय्जु प्रा. प्रेमशान्ति तुलाधरं थःगु नुगः खँ प्वंकादीगु दु ।

उगु दिवसया ज्याझ्वलय् छेँया हकदारपिनि पाखें दान रत्न तुलाधरं थःगु नुगः खँ प्वंकादीगु दु । .थुकथं हे ज्याझ्वलय् उदाय् समाजया निवर्तमान नायो पञ्चवीर सिंह तुलाधरं थःगु नुगः खँ नं तयादीगु दु । अथेहे दिवस हना व उदाय् छेँ व उदाय् म्युजियमया बुसादँया झ्वलय् उदाय् समाजया नायो एवं सभाया सभापति डा.रुपज्योति कसालं थःगु नुगः खँ तयाः सभा क्वचाय्कादिल ।

(सम्यक वाःपौ पाखें)

Categorized in पत्रपत्रिका