nepal life

स्वम्ह मिसात हत्या याःम्ह हत्यारा म्हमस्यूनि आःतकं

नेवा: अनलाइन न्युज | २०७४ पौष २८, शुक्रबार १०:२४:१५

स्वम्ह मिसाया श्रृंखलाबद्ध कथं हत्या जूगु ताःई दयेधुंकाः तकं खोटाङय् हत्या याःम्ह हत्यारा लुइके फूगु मदुनि ।

२०७३ साल माघ २६ गते बुधवाः बीभत्स अवस्थाय् सिनाच्वंगु अवस्थाय् लुयावःम्ह खोटेहाङ गाउँपालिका–९ लिच्कीराम्चेया १७ दँया रीता तामाङ, २०७४ साल जेठ १६ गते हत्या जूम्ह हलेसी तुवाचुङ नगरपालिका–७ महादेवस्थानया ५७ दँया ज्ञानीमाया विश्वकर्मा व २०७४ साल साउन ४ गते हत्या जूम्ह जन्तेढुंगा गाउँपालिका–६ दिप्लुङया ३७ दँया देवी विश्वकर्माया हत्याय् दुथ्याःम्ह हत्यारा आःतक नं लुइके मफूगु खः ।

घटनाय् दुथ्याःम्ह हत्यारा म्हसीकेगु नितिं अनुसन्धान जुयाच्वंसां नं लुइके मफुबलय् प्रहरी प्रशासनयात हे न्ह्यसः चिं ब्वलंगु हलेसी तुवाचुङ नगरपालिकाया उपप्रमुख विमला राई नं धयादीगु दु ।

उपप्रमुख राई नं धयादी, “ताःईतक नं हत्यारा म्हसीके मफुबलय् स्वम्ह मिसाया हत्या रहस्यमय जुजुं वनाच्वंगु दु । स्वम्ह मिसाया श्रृंखलाबद्ध हत्या जूगुथें जाःगु जघन्य घटनाय् दुथ्याःपिं अपराधीया म्हसीका मजूबलय् सर्वसाधारणय् ग्याःचिकु ब्वलंगु दु ।”

हत्याया विषयस अनुसन्धान जुयाच्वंगु जिल्ला प्रहरी ज्याकुथि खोटाङया प्रहरी नायब उपरीक्षक लोकदर्शन थापां धयादीगु दु । सिम्पानी बजारया होटल व्यवसायी शिव खड्काया होटलय् ज्या यानाः वयाच्वंम्ह रीताया सीम्ह अमाईया दिं जंगलया लँपुसिबें थ्यंमथ्यं ४० मिटर क्वय् भीरय् लुयावःगु खः । घटनास्थलय् विभत्स अवस्थाय् लुयावःम्ह मिसायात सामूहिक बलात्कार लिपा हत्या याःगु आंशका याःगु खः ।

अथेहे, छुसि (स्याउला) मुंकाःः छेँय् लिहाँ वयेगु झ्वलय् इलाका प्रहरी ज्याकुथि, हलेसीपाखें थ्यंमथ्यं ५ मिनेट तापाक्क च्वंगु थासय् ज्ञानीमायाया हत्या जूगु खः ।

थःछेँ जन्तेढुंगा गाउँपालिाका–४ डम्वर्खु शिवालयपाखें छेँय् लिहाँ वयेगु झ्वलय् सम्पर्कविहीन जूगु निन्हुया दिं लुयावःम्ह देवीया सीम्ह लँपुसिबें थ्यंमथ्यं ५०० मिटर क्वय् कम्मरया क्वय् वसः त्वकातःगु, छ्यनं हि बाः वयाच्वंगु अवस्थाय् लुयावःगुलिं घटनायात शंकास्पद कथं काःगु दु । घटना लिपा नेपाल प्रहरीया विशेष पुचः वयाः अनुसन्धान याःसां नं हत्यारा लुइके फूगु मदुनि ।

मिसापिनिगु श्रृंखलाबद्ध हत्या जुइधुंकाः जिल्लाय् च्वंगु मिसा अधिकारकःमिपिन्सं तत्काल हत्यारा लुइकाः कानूनी कठघराय् हयेत प्रहरीयात दबाब बियाच्वंगु दु । इमिसं तःक्वःमछि प्रहरी ज्याकुथिइ थ्यंकाः घटनाया विषयस जानकारी माग यानाच्वंगु दु ।

Categorized in दुर्घटना-अपराध