nepal life

स्वम्ह नेपाःमि तेक्वान्दो कासामिं अमेरिकाय् स्वर्णपदक त्याकल

नेवा: अनलाइन न्युज | २०७४ फाल्गुण १, मंगलबार १८:०४:४८

फेब्रुअरी १० तारिखय् अमेरिकाया टेक्सासय् क्वचाःगु तेक्वान्दो कासाय् नेपाःपाखें वंपिं स्वम्ह कासामिं स्वर्णपदक त्याकूगु दु ।

नेपाःमि राष्ट्रिय कासामि मानकुमारी चौलागाई, ज्ञानी चुनार व ताराकुमार रायमाझीं टेक्सास राज्यया ड्यालसय् क्वचाःगु अन्तर्राष्ट्रिय तेक्वान्दो कासाय् स्वर्णपदक त्याकूगु खः ।

कासाया मिसा फेदर बेल्ट समूह ५३–५७ केजी समूहलय् मानकुमारी चौलागाई नं सेमी फाइनलय् भारत व फाइनलय् साल्भाडोरया कासामियात बुकाः स्वर्णपदक त्याकूगु खः ।

अथेहे, ५८–६२ केजीया तौल समूहलय् मिसा लाईट बेल्टय् ज्ञानी चुनारं सेमी फाइनलय् पनामा व फाइनलय् अमेरिकाया कासामियात बुकाः स्वर्णपदक त्याकूगु खः ।

मिजंपाखेया फ्लाई बेल्ट अन्तर्गत ५४–५८ तकया तौल समूहलय् ताराकुमार रायमाझीं सेमी फाइनलय् भारत व फाइनलय् मेक्सिकोयात बुकाः स्वर्णपदक त्याकूगु खः ।

नेपाली पुचःया व्यवस्थापक व टोली प्रशिक्षकय् नेपाःया पूर्व राष्ट्रिय कासामि व आः अमेरिकाया बाल्टिमोरय् च्वंगु एभरेष्ट वर्ल्ड क्लास टेक्वान्दो एकेदेमि संचालन यानाः वयाच्वंम्ह मास्टर कुमार कार्की खः ।

उपिं स्वम्ह राष्ट्रिय कासामिपिन्त नेपाःया पूर्व बरिष्ठ तेक्वान्दो प्रशिक्षक मास्टर अमीर श्रेष्ठया विशेष ग्वाहालिइ अमेरिकाया उत्कृष्ट मध्येया हे उत्कृष्ट ‘टिम एनटिए यूएसए’ स निवाःया विशेष प्रशिक्षण नं कयाः वयाच्वंगु दु ।

नेपाःमि पुचः फेब्रुअरी १८ तारिख नेपाः लिहाँ वइगु ज्याझ्वः तयातःगु दु ।

Categorized in कासा