nepal life

स्वंगू मतपत्रय् प्यगू थासय् छाप गुकथं तयेगु ? (भिडियो स्वयादिसँ)

नेवा: अनलाइन न्युज | २०७४ मङ्सिर २०, बुधबार १७:२९:०६

(थन क्लीक यानाः भिडियो स्वयादिसँ)

मंसीर २१ गते बिहिवाः प्रदेश व प्रतिनिधिसभा निर्वाचन अन्तर्गत ४५ गू जिल्लाया निर्वाचन क्षेत्रय् मतदान जुइत्यंगु दु । तर मतदाता शिक्षा धाःसा लक्षित मतदातातक मथ्यंगु आपाःसिनं धयाच्वंगु दु ।

लिपांगु इलय् वयाः सर्वोच्च अदालतं ब्यूगु अन्तरिम आदेशया हुनिं मतपत्र परिवर्तन जुयाः मतदाता शिक्षा ज्याझ्वः प्रभावित जूगु दु । गुकिया हुनिं मतदाता शिक्षा ज्याझ्वः अपेक्षित रुपं प्रभावकारी जुइमफूगु निर्वाचन आयोगं नं स्वीकार याःगु दु । न्हापा छगू मतपत्रया तयारी याःगुलि लिपा निगू मतपत्र दयेकूगु खः ।

मतदान गुकथं यायेगु ?

प्रतिनिधिसभा व प्रदेशसभा निर्वाचनय् स्वंगू कथंया मतपत्र दइ । समानुपातिकपाखे प्रतिनिधिसभा व प्रदेशसभाया मतपत्र छगू हे पानाय् दइ । क्वय् व च्वय् यानाः मतसंकेत यायेमाः । तर प्रत्यक्षय् धाःसा फरक फरक मतपत्र दइ । प्रदेश कथं मतपत्र नं फरक फरक दइ । फुक्क प्रदेशय् समान दलतय्गु उम्मेदवारी मलाःगु हुनिं मतपत्र नं फरक फरक दयेकूगु खः ।

प्रत्यक्षपाखे प्रतिनिधिसभाया नितिं वाउँगु रंगया मतपत्र दु । थःम्ह ल्ययागु दलया चुनाव चिन्हय् मतदातां मत संकेत यायेमाः । मतपत्रय् चुनाव चिं नं वाउँगु रंगया हे दइ ।

प्रदेशसभाया प्रत्यक्षपाखे हाकू रंगया मतपत्र दु । हाकू रंगया मतपत्रय् हाकू रंगया हे चुनाव चिं दइ । मतदातां थःम्ह ल्ययागु दल बाय् स्वतन्त्र उम्मेदवारया छगू जक चुनाव चिन्हय् मत तयेमाः ।

समानुपातिकपाखे धाःसा छगू हे पानाय् प्रतिनिधिसभा व प्रदेशसभा निर्वाचनय् भाग काःगु दलतय्गु चुनवा चिं दइ । मतदातां च्वय् च्वंगु भागय् प्रतिनिधिसभा निर्वाचनपाखे समानुपातिक निर्वाचनय् भाग काःम्ह उम्मेदवारया चुनाव चिन्हय् मत बिइमाः । थःम्हं ल्ययागु छगू जक दलया चुनाव चिन्हय् मत तयेमाः । समानुपातिकया मतपत्र ह्याउँगु रंगया जुइ ।

अथेहे, वहे पानाया क्वय् च्वंगु भागय् प्रदेशसभाया समानुपातिक निर्वाचनय् भाग काःगु दलया चिं दइ । मतदातां थःम्हं ल्ययागु छगू दलया चिन्हय् मत संकेत यायेमाः ।

गुकथं जुइ बदर ?

मत बिइबलय् छगू हे मतपत्रय् छगू सिबें अप्वः उम्मेदवारया चिन्हय् मत संकेत याःसा स्वतः मत बदर जुइ । अथेहे, उम्मेदवारया चुनाव चिं दूगु कोथासिबें पिने स्वस्तिक छाप लाःसां नं मत बदर जुइ ।

स्वस्तिक छाप बाहेक मेमेगु छाप तःसां नं मत बदर जुइ ।

अथेहे, स्वस्तिक छाप सीमदयेक लतपत जुइक तःसां नं मत बदर जुइ । कोथासिबें पिने छाप तःसा बाय् निगू चिंया दथुइ लाइकथं मत संकेत याःसां नं मत बदर जुइ । मतदान अधिकृतया सही मदूगु मतपत्रपाखें मत ब्यूसां नं मत बदर जुइ ।

Categorized in राष्ट्रिय