nepal life

स्याउसिबें गोलभेंडा थिके जुल

नेवा: अनलाइन न्युज | २०७४ कार्तिक २२, बुधबार १६:२८:४७

स्वनिगलय् तरकारीया मूल्यस न्हूगु रेकर्ड तःगु दु । आपूर्ति व्यवस्था सामान्य जुयाच्वंगु हे अवस्थाय् तरकारीया मू थिके जूगु खः ।

सामान्य अवस्थाय् थुकथं अधिकांश तरकारी छक्वलं तरकारी थिकेगु विन्दुइ थ्यंगु मदुनि । कालिमाटी तरकारी व फलफूल बजार विकास समितिया उपनिर्देशक विनय श्रेष्ठया कथं तरकारीया मू उच्च विन्दुइ थ्यनाः मद्दिक्क अप्वयाः वनाच्वंगु खनेदूगु न्हापांगुखुसि खः ।

उपनिर्देशक श्रेष्ठं धयादी, “तरकारीया मू च्वय् क्वय् जुयाच्वनी । छुं तरकारीं ला मूल्यस रेकर्ड हे तल । मू न्हिथं क्वाहाँ वइगु व थाहाँ वनीगु जुयाच्वनीगु खः, तर थुगु खुसि अप्वःगु अप्वया हे च्वंगु दु । स्वन्ति न्ह्यःनिसें थिके जुयाच्वंगु तरकारीया मू आःतक नं म्हो जूगु मदुनि ।”

आः अधिकांश तरकारी किलोया सच्छि तकां म्हो भावं न्यायेगु मदु । कालिमाटी बजारय् हे मू उच्च जुइधुंकाः खुद्रा बजारय् मू अनियन्त्रित जूगु दु ।

आः बजारय् स्याउसिबें गोलभेंडा थिके जूगु दु । कालिमाटी बजारय् गोलभेंडाया खुद्रा मू किलोया १२० तका दां थ्यंगु दु । खुद्राय् १५० तक मिइगु ज्या जुयाच्वंगु दु ।

तुयूगु आलुया मू किलोया ७० तका जुयाच्वंगु कालिमाटी बजारय् काउलीया मू ११० तका दां थ्यंगु दु । कालिमाटीइ भुति व मटरकोशा किलोया १३० तका दां थ्यंगु दु । वाउँगु प्याज १४० तका दां प्रतिकेजी जुयाच्वंगु दु ।

१ किलो घ्यःसिमि न्यायेत ११० तका व खाइककःचा १२० तका दां पुलेमाःगु दु । गाजर नं किलोया १३० तका दां थ्यंगु दु । कालिमाटी बजारय् हे परवल ८० तका दां जुयाच्वंगु दुसा वाउँगु फसिया मू ७० तका दां थ्यंगु दु ।

भान्टाया मू १०० तका प्रतिकेजी तूसा पलःचा व चसूचाया तरकारी किलोया ११० तकाय् मियाच्वंगु दु । कागती किलोया ६०० तका दां पुलेमाःगु अवस्था थ्यंगु दु ।

तरकारी मल्ता किलोया १३० तका दां थ्यंगु दुसा वाउँगु लाबाया मू किलोया१७० तका दां थ्यंगु दु । वाउँगु धन्याँ किलोया ३९० तका दां थ्यंगु इलय् वाउँगु मल्ता ९० तका दां प्रतिकेजीइ मिइगु ज्या जुयाच्वंगु दु ।

कालिमाटी बजारय् म्हुकं (च्याउ) किलोया २०० तका थ्यंगु दुसा ब्रोकाउली प्रतिकेजी १३०, चुकन्दर ९०, जिरीया साग ११०, पार्सले १२० तका दां थ्यंगु दु ।

कालिमाटी बजारय् स्वनिगःया हे दकले दंगु तरकारी दइ । अनं हे खुद्रा विक्रेतां यंकाः मीगु जूगुलिं मेमेगु क्षेत्रय् तरकारीया मू थ्यसिबें उच्च जुइ ।

पाछै छगू मुथाया मू ५० सिबें अप्वः पुलाः न्यानाच्वंगु दु उपभोक्तां । आलुया हे मू नं अस्वाभाविक रुपं अप्वःगु दु ।

कालिमाटी बजार विकास समितिया धापूयात माने यायेगु खःसा उत्पादन म्हो जुया हे मूल्यबृद्धि उच्च जूगु खः ।

भारतपाखें वइगु गंगु तरकारी थिके जूगु धाःगु दु समितिया उप निर्देशक श्रेष्ठ । वयकलं धयादी, “थुगु दँ आपालं वा वल । उकिं तरकारी बालीत प्रभावित जुल । उकिं माग कथं बजारय् तरकारी वये मफूगु खः । तरकारीया मू म्हो हे मजूगुया हुनि नं थ्वहे खः ।”

समितिं अझ नं छुं ई तरकारीया मू म्हो मजुइगु अनुमान याःगु दु । तरकारीइ मद्दिक्क मूल्यबृद्धि जुयाच्वंबलय् तरकारी उत्पादकतसें धाःसा राहत काःगु दु । स्वनिगलय् स्वन्ति न्ह्यःनिसें मद्दिक्क तरकारीया मू अप्वयाच्वंगु दु ।

Categorized in बजाः