नेवा: अनलाइन न्युज | २०७४ आषाढ १४, बुधबार ०७:१४:११

प्रदेश ल्याः १, ५ व ७ य् स्थानीय तहया निक्वःगु चरणया निर्वाचन अन्तर्गत थौं बुधवाः सुथय् ७ ता ईनिसें सनिलया ५ ता ईतक मतदान जुइत्यंगु दु ।

मतदान जुइगु स्वंगू प्रदेशय् मुक्कं ३३४ स्थानीय तह दुथ्याःगु दु । २८७४ गू वडाय् ४५८१ गू मतदान स्थल दुथ्याःगु दुसा ८३६४ गू मतदान केन्द्र दुथ्याःगु दु ।

६४ लख ३२ हजार ६५ म्ह मतदातापिन्सं १५ हजार ३८ म्ह जन प्रतिनिधि पदाधिकारीपिन्त निर्वाचित याइ । ३५ गू जिल्लाया १ गू महानगरपालिका, ७ गू उपमहानगरपालिका, १११ नगरपालिका व २१५ गाउँपालिकाय् ६२ हजार ४०८ उम्मेदवार चुनावी मैदानय् क्वाहां वःगु दु ।

निर्वाचन आयोगं मतदानया नितिं मुक्कं मतदान केन्द्रया मुक्कं तयारी पूवने धुंकूगु धाःगु दु । प्रमुख निर्वाचन आयुक्त डा. अयोधीप्रसाद यादवया कथं मतदान जुइगु ८ हजार ३ सय ६४ गू मतदान केन्द्रय् बल्लाक सुरक्षा व्यवस्था मिलेयाःगु खँ कनादीगु दु ।

प्रमुख निर्वाचन आयुक्त यादवया कथं सुंपाखें जनताया मताधिकारयात कुण्ठित याकेगु कुतः जुल धाःसा उकियात निस्तेज यायेगु विश्वास प्वंकादिल ।

निर्वाचन तयारी बारे जानकारी बिइत आयोगं मगंलवाः ग्वसाः ग्वःगु पत्रकार सम्मेलनय् प्रमुख आयुक्त यादवं धयादी, “सुरक्षाया बांलाक्क प्रबन्ध याःगुलिं न्हापांगु चरणया सिबें थुगु निक्वःगु चरणया निर्वाचनय् जनसहभागिता उत्साहजनक खनेदइ ।”

न्हापांगु चरणया निर्वाचन प्रदेश ल्याः ३, ४ व ६ या बैशाख ३१ गते क्वचाये धुंकूगु दुसा स्वक्वःगु चरणया प्रदेश ल्याः २ या निर्वाचन धाःसा असोज २ गते यायेगु घोषणा याःगु दु ।

Categorized in स्थानिय-समाज