nepal life

सेनां निर्वाचन स्यंकीपिन्त गोली क्ययेकेफु ः रक्षामन्त्री भिमसेनदास प्रधान

नेवा: अनलाइन न्युज | २०७४ मङ्सिर २०, बुधबार १५:३०:४७

रक्षामन्त्री भिमसेनदास प्रधानं निर्वाचन स्यंकेत्यंपिन्त गोली क्ययेकेगु अधिकार नेपाली सेनायात बियागु स्पष्ट यानादीगु दु ।

मन्त्री प्रधानं धयादी, “निर्वाचन स्यंकीपिं उच्छृंखल तत्वयात निस्तेज यायेगु नितिं नेपाली सेनायात जिमिसं माःगु निर्देशन बियागु दु । सेनायात गोली क्ययेकेगु तकया अधिकार बियागु दु ।”

रिपोर्टर्स क्लब नेपालं बुधवाः ग्वसाः ग्वःगु विशेष साक्षात्कार ज्याझ्वलय् रक्षामन्त्री भिमसेनदास प्रधानं निर्वाचनया मुक्कं तयारी पूवनेधुंकूगु व मतदातापिनिगु बालांक्क सुरक्षा प्रबन्ध याःगुलिं ढुक्क जुयाः मतदान यायेत आग्रह यानादिल । मन्त्री प्रधानं धयादी, “मंसीर २१ गते जुइगु निर्वाचनय् अत्यधिकसिबें अत्यधिक मात्राय् सहभागिता जुइमा ।”

आःतक निर्वाचन विरोधधी गतिविधि याइपिं ६०० म्हसिबें अप्वःयात ज्वनेधुनागु व मुद्दा न्ह्याकेधुनागु मन्त्री प्रधानं जानकारी बियादीगु दु ।

मंसीर २१ गते जुइगु निर्वाचनय् ३८,००० म्ह नेपाली सेना परिचानल जुइगु तकं मन्त्री प्रधानं जानकारी बियादीगु दु ।

नेपाल बार एशोसियसनया नायः शेरबहादुर केसीं लोकतन्त्रया रक्षाया नितिं निर्वाचन जूगुलिं निर्वाचन प्रक्रियाय् सहभागी जुइत फुक्कसित आग्रह यानादीगु दु ।

वय्कलं निर्वाचनयात स्वच्छ, भयरहित व स्वतन्त्र रुपं क्वचायेकेगु नितिं सुरक्षा व्यवस्थापनय् कडाई यायेत सरकारयाके आग्रह नं यानादीगु दु ।

Categorized in राष्ट्रिय