nepal life

सूर्तीजन्य पदार्थनियन्त्रण महासन्धि, २०३० रणनीति सार्वजनिक

नेवा: अनलाइन न्युज | २०७४ पौष २८, शुक्रबार १७:४५:०१

स्वास्थ्य मन्त्रालयं सूर्तीजन्य पदार्थया छ्यलाबुलाय् म्हो यायेत सूर्तीजन्य पदार्थ नियन्त्रण महासन्धि, २०३० रणनीति सार्वजनिक याःगु दु ।

उगु रणनीतिं नीति निर्माता, सेवा प्रदायक, थ्वलिसे सम्बन्धित मन्त्रालय, निकाय व राष्ट्रिय व अन्तर्राष्ट्रिय गैरसरकारी संस्थायात सूर्तीजन्य पदार्थ नियन्त्रण ज्याझ्वः विकास व कार्यान्वयनय् मार्गदर्शन याइ ।

राष्ट्रिय स्वास्थ्य शिक्षा, सूचना व संचार केन्द्रं उगु महत्वकांक्षी रणनीति तयार याःगु खः ।

कन्द्रपाखें शुक्रवाः येँय् ग्वसाः ग्वःगु ज्याझ्वलय् स्वास्थ्य मन्त्री दीपक बोहोरां रणनीति सार्वजनिक यासें संक्रमण मजुइगु ल्वय्या मू कारक तत्वया रुपं दूगु सूर्तीजन्य पदार्थ नियन्त्रण व रोकथामय् रणनीति कोशेढुंगा सावित जुइगु विश्वास प्वंकादिल ।

मन्त्री बोहोरां स्थानीय, प्रदेश व केन्द्रय् रणनीतियात कार्यान्वयनय् हयेत अन्तरमन्त्रालय समन्वयया आवश्यकता क्यनादिसें सूर्तीजन्य पदार्थ उत्पादनय् हे पनेमाःगु खँ धयादिल ।

सरकारं विश्व स्वास्थ्य संगठनया सूर्तीजन्य पदार्थ नियन्त्रण महासन्धिइ सन् २००३ डिसेम्बर ३ स ल्हाःचिं तयाः सन् २००६ या नोभेम्बर ७ य् पारित याःगु खः । महासन्धि कार्यान्वयन यायेत उगु सम्बन्धी ऐन व नियम तकं मन्त्रालयं सार्वजनिक यायेधुंकूगु दु ।

मन्त्रालयया कथं नेपालय् सूर्तीजन्य पदार्थ सेवनया हुनिं दँय् दसं झिंन्याद्वःम्ह मनूत अकालय् हे सीगु जुयाच्वंगु दु । खासयानाः क्यान्सर, दीर्घ श्वासप्रश्वास, नुगःचु ल्वय् व मधुमेहथें जाःगु ल्वय् थुकिया सेवनया हुनिं जुइगु जुयाच्वंगु दु ।

स्वास्थ्य मन्त्रालयया छ्याञ्जे डा. पुष्पा चौधरीं सरेमजुइगु ल्वय्यात म्होे यायेत सूर्तीजन्य पदार्थया सेवनय् म्हो यायेत आवश्यक जूगुलि बः बियादिसें रणनीतियात कार्यान्वयनय् हयेत निर्देशन बियादीगु खः ।

स्वास्थ्य सेवा विभागया महानिर्देशक डा. रोजेन्द्र पन्त व केन्द्रया निर्देशक बद्रिबहादुर खड्कां सूर्तीजन्य पदार्थया नियन्त्रणं दिगो विकासया आज्जु कायेत ग्वाहालि जुइगु विश्वास प्वंकादिल ।

रणनीतिइ सूर्तीजन्य पदार्थया छ्यलाबुलाया अनुगमन, कुँ रहित सार्वजनिकस्थल, सूर्तीजन्य पदार्थ त्याग यायेत प्रोत्साहन लिसेंया बुँदात दु ।

Categorized in राष्ट्रिय