nepal life

सिटी एक्सप्रेस मनी ट्रान्सफर व कोरियाया जीमनी ट्रान्स दथुइ रेमिट्यान्स सम्झौता

नेवा: अनलाइन न्युज – ललेन्द्र शाक्य | २०७४ कार्तिक २४, शुक्रबार १३:०६:०८

जापानया प्रतिष्ठित रेमिट्यान्स कम्पनी सिटी एक्सप्रेस मनी ट्रान्सफर जापान व कोरियन कम्पनीया मंकाः लगानीइ पलिस्था जूगु कम्पनी जीमनी ट्रान्सं नोभेम्बर ११, २०१७ शनिवाःनिसें थःगु सेवा सुरु याइगु जूगु दु ।

दक्षिण कोरिया सरकारं थ्वहे जुलाई महिनाय् प्राइभेट रेमिट्यान्स कम्पनीपाखें सेवा संचालनया नितिं आवेदन खुल्ला याःगु खः । रेमिट्यान्स सेवा संचालनया अनुमतिया नितिं आपालं कम्पनीतसें आवेदन ब्यूगुलि अनुमति प्राप्त याःगु छुं सिमित कम्पनीमध्ये जीमनी ट्रान्स छगू खः ।

आःयात कम्पनीया आन्सान शाखापाखें सेवा संचानल यायेत्यंगु जीमनी ट्रान्सं छुं दिं दुने हे मोबाइल एपपाखें नं सेवा न्ह्याकीगु जूगु दु ।

आः विद्यमान रेमिट्यान्स कम्पनीया अनलाइन सेवा कायेत सेवाग्राही कम्ती नं छक्वः शाखा वनेमाःगु झन्झटया प्रक्रिया सहज जुइमा धैगु अभिप्रायया लिसें जीमनी ट्रान्सं थःगु मोबाइल एप सेवा पूर्ण अनलाइन रजिष्टर यायेजीगु कथंया हयेत्यंगु खः । जीमनी ट्रान्सया मोबाइल एप न्ह्यायेधुंकाः सेवाग्राही गनं मवंसे स्वयम थःम्हं हे छेँय् च्वनाः दर्ता यायेफइगु जूगु दु ।

कोरियापाखें छ्वःगु १० मिनेटय् हे नेपालय् च्वंपिं थःथितिपिन्सं नेपाल अधिराज्यन्यंकंया सिटी एक्सप्रेस मनी ट्रान्सफरया ५००० सिबें अप्वः भुक्तानी केन्द्रतपाखें रकम कायेखनीगु जूगु दु ।

लिसें नेपालय् छुं नं बैंक खाताय् नं अःपुक हे रकम जम्मा याये जिइ । जीमनी ट्रान्सया सेवा उपयोग यायेबलय् क्वःछ्यूगु रकम छ्वयेगु न्यूनतम शुल्क बाहेक छुं नं अतिरिक्त शुल्क तुइमखु ।

सरल, सुरक्षित, छिटो, छरितो व सहज सेवाया लिसें संचालनय् वयेत्यंगु जिमनी ट्रान्सया सेवा न्ह्यायेधुंकाः कोरिया व नेपालय् रेमिट्यान्सया न्हूगु आयाम थप जुइगु लिसें हुण्डी कारोवार नं आपालं ल्याखय् म्हो जुइगु आशा याःगु दु ।

सिटी एक्सप्रेस मनी ट्रान्सफरं अमेरिका, जापान, यूएई, भारत, साउदी अरब, कतार, मलेसिया, बेलायत लिसेंया नेपालीपिं ज्या यानाच्वंगु फुक्क धैथें मुलुकपाखें थीथी रेमिट्यान्स कम्पनीतलिसे सहकार्य यानाः नेपालय् रेमिट्यान्स दुतहयाच्वंगु दु ।

Categorized in बजाः