साहित्य ख्यलय् ‘हिरामोती’, बिस्कं पहःया ज्याझ्वः !
नेवा: अनलाइन न्युज – विजयरत्न | २०७४ मङ्सिर २९, शुक्रबार १८:४२:४१
नेपालभाषा साहित्य ख्यलय् नांजाःम्ह उपन्यासकार व बाखंच्वमि मथुरा साय्मिं ‘हिरामोती’ शीर्षक बियाः थीथी बाखंच्वमिपिं पाखें बाखं च्वकाः धेंधेंबल्लाया रुपं छगू न्हूगु कथंया ज्याझ्वः न्ह्याकूगु खः ।
वहे ‘हिरामोती’ शीर्षकया बाखं मुनाया विशेषांक ईलोहँ प्रकाशनया ‘नःलि’ साहित्यिक पत्रिकाय् पिदंगु खः ।
साहित्यकार भाजु मथुरा साय्मिया कुतलय् शुक्रवाः येँया खुसिबुइँ च्वंगु नेपाः ब्यांक्वेटय् छगू बिस्कं सवाःया ज्याझ्वः जूगु दु ।
साहित्यकार साय्मिं छुं दिं ‘हिरामोती’ शीर्षक बियाः उगु शीर्षकय् बाखं च्वयेत साहित्यकारपिन्त इनाप यानादीगु खःसा वहे कथं १८ म्ह मिजं व २२ म्ह मिसा बाखंच्वमिपिन्सं ‘हिरामोती’ शीर्षकयात ल्वय्क बाखं च्वयाः दुतिंगु खः ।
थथे दुहां वःगु बाखनय् मिसापाखें कान्ति मानन्धरं न्हाप व अमिता महर्जन लुमिलां हःपाः सिरपाः त्याकादीगु खःसा मिजंपाखें राजेन मानन्धर न्हाप व सुनिल बज्राचार्य हःपाः सिरपाः त्याकेत ताःलाःगु खः ।
न्हाप सिरपाः त्याकूपिं मिसा व मिजं बाखंच्वमि निम्हेसित म्हतिं स्वद्वः स्वद्वः तका व हःपाः सिरपाः त्याकूपिं मिसा मिजं बाखंच्वमि निम्हेसित म्हतिं झिंन्यासः झिंन्यासः तकाः सिरपाः कथं लःल्हाःगु खः ।
अथेहे, सिरपाः क्वःछिगु नितिं मिजं बाखंच्वमिपिनिगु नितिं नांजाःम्ह साहित्यकार व साहित्य विश्लेषक भुषणप्रसाद श्रेष्ठ व मिसा बाखंच्वमिपिनिगु नितिं समालोचक प्रा. प्रेमशान्ति तुलाधरपिं निर्णायक कथं च्वनादीगु खः ।
थथे दुहाँ वःगु मुक्कं ४० पू बाखं ईलोहँ प्रकाशनया साहित्यिक पत्रिका ‘नःलि’यानिगू बिस्कं विशेषांक ल्याः जुयाः पिहाँ वःगु दुसा उकिया नापनापं बाखंच्वमि मथुरा साय्मिं च्वयादीगु प्यपु बाखं मुनाः ‘हिरामोती’ नांयागु छचाः अडियो सिडि चाः नं पितब्वज्या जूगु खः ।
थ्व अडियो सिडि चाः दुने साहित्यकार शशीकला मानन्धरं मथुरा साय्मिया बाखनय् सः तयादीगु दु ।
ईलोहँ प्रकाशनया कजि नरेशवीर शाक्यया सभानायःसुइ न्ह्याःगु ज्याझ्वललय् मू ज्याझ्वः ग्वसाः ग्वयादीम्ह मथुरा साय्मि, बाखंया सिरपाः निर्णायकपिं भूषणप्रसाद श्रेष्ठ व प्रा. प्रेमशान्ति तुलाधरलिसें थीथी वक्तापिन्सं थःथःगु नुगःखँ तयादीगु खः ।
Categorized in नेवाः