nepal life

साउदी अरबय् म्यानपावरया ठगीं १७ म्ह युवा अलपत्र

नेवा: अनलाइन न्युज | २०७४ आषाढ ७, बुधबार १०:४६:२७

छुं दिं न्ह्यः उदयपुर जिल्लाया थ्यंमथ्यं १७ म्ह युवा छगू म्यानपावरपाखें वैदेशिक रोजगारीया झ्वलय् साउदी अरब थ्यंकेगु नामय् ठगीइ लानाः आः साउदी अरबय् बेपत्ता जूगु दु ।

येँया सिनामंगलय् च्वंगु साउनलाइन्स रिक्रुटमेन्ट सर्भिस मेनपावरया उपशाखा उदयपुरया गाईघाटपाखें अनया मेनपावर संचालक नेत्र लिम्बू व रेश्मा लिम्बूपाखें स्ववाः न्ह्यः साउदीइ वंपिं १७ म्ह युवा आः बिचल्लीइ लानाच्वंगु छम्ह पीडित युवाया दाजु होमराज राई नं जानकारी ब्यूगु दु ।

साउदीइ बिचल्ली जूपिं उदयपुरया गोविन्द खड्का, होमबहादुर खड्का, युवराज थापा, राजन कार्की, रुद्र बस्नेत, तेजबहादुर कटुवाल, बसन्त राई, दुर्गानारायण श्रेष्ठ, तेजबहादुर कटुवाल, उमेश खड्का, युवराज कार्की, सोभित राई, तोपबहादुर मगर, मोहन राई, मनोज राई, मातृका घिमिरेलिसेंया युवापिं लाःगु पीडितया छेँजःपिन्सं धाःगु दु ।

प्रतिव्यक्ति १ लख तकाया दरं रकम कयाः युवापिन्त गाईघाटया म्यानपावर संचालक लिम्बू दम्पतीं येँया मू म्यानपावर साउनलाइन्स मार्फत साउदी छ्वःसां नं साउदी थ्यंपिं युवापिन्सं सम्झौता कथं ज्या मदूगु व आः विजोग अवस्थाय् होटलय् च्वनाः च्वनेमाःगु राजन कार्कीया दाजु सरोज कार्कीं जानकारी ब्यूगु दु ।

म्यानपावर संचालक लिम्बू दम्पत्ती धाःसा सम्पर्कविहीन अवस्थाय् लाःगु नं पीडितया थःथितिपिन्सं धाःगु दु ।

Categorized in लजगाः