nepal life

सरकारया मनोनयन राष्ट्रपतिं अस्वीकार यायेमज्यु ः संचारमन्त्री बस्नेत

नेवा: अनलाइन न्युज | २०७४ फाल्गुण १, मंगलबार १६:१८:०४

सूचना व संचारमन्त्री मोहनबहादुर बस्नेतं सरकारं राष्ट्रियसभा दुजलय् याःपिं स्वम्हेसिगु मनोनयन राष्ट्रपतिं अनुमोदन याइगु धयादीगु दु ।

मंगलवाः रिपोर्टर्स क्लबय् मन्त्री बस्नेतं सरकारं राष्ट्रियसभाय् मनोनित गोपाल बस्नेत, कृष्ण पौडेल व चाँदनी जोशीया नां राष्ट्रपति विद्यादेवी भण्डारी न्ह्यःने छ्वयेधुंकूगु जानकारी बिसें उगु नां अनुमोदन जुइगु दाबी यानादीगु खः ।

वय्कलं प्रधानमन्त्रीं याःगु सिफारिसयात राष्ट्रपतिं अस्वीकार यायेमज्यूगु खँय् बः बियादीगु खः । वय्कलं धयादी, “यदि प्रधानमन्त्रीं संविधानसम्मत रुपं याःगु सिफारिसयात राष्ट्रपतिं अस्वीकार यानादिल धाःसा थ्व ला क्याविनेट प्रणालीयात कयाः न्ह्यसः चिं जुइ नि सा, जितः विश्वास दु, राष्ट्रपतिं नां अनुमोदन यानादी ।”

मन्त्री बस्नेतं एमाले नायः केपी शर्मा ओलीलिसें गुलिखे शीर्ष नेतातसें सरकारं याःगु निर्णयत आः निर्माण जुइगु सरकारं माने मयायेगु धकाः सार्वजनिक अभिव्यक्ति ब्यूगु प्रति आपत्ति प्वंकादीगु खः ।

मन्त्री बस्नेतं धयादी, “एमाले नायः केपी शर्मा ओलीं जिमिसं यानागु मनोनित माने मयायेगु धैगु खँ न्यना । पार्टीया बैठकं वा ख्वालं थः अनुकूल धयाः मज्यूनि सा, लहडय् न्वःवायेगु ज्या म्हिगः नं जूगु खः, जिमिसं ला संविधान कथं ज्या यानागु दु ।”

Categorized in राजनीति