nepal life

सम्पदा पुनःनिर्माणया नितिं ललितपुर विकासया लागि समाजया २३ करोड ७ लख बजेट

नेवा: अनलाइन न्युज | २०७४ कार्तिक २६, आइतबार ११:५३:१६

–राजेश बज्राचार्य

यलया थीथी ऐतिहासिक सम्पदा, बौद्ध विहारया पुनःनिर्माणय् सक्रिय ललितपुर विकासया लागि समाजया ११ क्वःगु दँ मुँज्या क्वचाःगु दु । समाजं थःगु ५ करोडया नियमित बजेटयात थुगुसीइ २८ करोड ७ लख बजेट प्रस्तावित याःगु दु ।

भुखाचं क्षतिग्रस्त सम्पदा पुनःनिर्माणया नितिं ललितपुर विकासया लागि समाजपाखें २३ करोड ७ लाखया प्रस्ताव भारतीय राजदूतावासय् पेस याःगु खः ।

१० दँ न्ह्यःनिसें भारतीय राजदूतावासपाखें ग्वाहालि कयाः यलया ऐतिहासिक सम्पदा, बौद्ध विहारया पुनःनिर्माण ज्याय् सक्रिय जुयाच्वंगु समाजया नायो बुद्धिराज बज्राचार्यं थुगु बजेट प्रस्ताव यानादीगु खः । भुखाचं क्षतिग्रस्त जुयाः पुनःनिर्माण मजुनिगु जीर्ण सम्पदा पुनःनिर्माण थुगुसी पूवंक न्ह्याकेत समाजया नियमित ५ गू करोडया बजेटयात बृद्धि यायेगु तातुनां वय्कलं प्रस्ताव यानादीगु खः ।

दँ मुँज्याय् मू पाहाँकथं झायादीम्ह भारतीय राजदूतावासया महामहिम राजदूत मंजीब सिंह पुरीयात बजेट ग्वाहालिया इनाप यासें वय्कलं धयादिल, ‘थुगु ज्याः पूवंकेत जिं ८१ दँ मखु ५५ दँ दुम्ह ल्याय्म्हया उर्जा ज्वनाच्वना । १० दँतक भगवानया चिठी मवइगु जूसा यलया मुक्कं मूर्त–अमूर्त सम्पदायात संरक्षित जुइगु थःगु परिकल्पना पूवंकेगु इच्छाशक्ति ल्यंदनि ।’

प्रस्तावित योजनाय् हिरण्यवर्ण महाविहार, गुइतः बही व दिगि, नापीचन्द्र महाविहार, कुमारी छेँ, गोपीचन्द महाविहार, जेष्ठवर्ण महाविहार लगायत बौद्ध विहार, थीथी फल्चा व देगःया पुनःनिर्माण दुथ्याः ।

ज्याझ्वःसं नेपाःया नितिं भारतीय राजदूत मंजीब सिंह पुरीं यलया ऐतिहासिक व पुरातात्विक महत्वया मूर्त सम्पदा, बौद्ध विहार, फल्चा, सतः जक मखु अमूर्त संस्कृति व ललितकलाया संरक्षण व पुनःनिर्माणया नितिं भारत सरकारं फूगु ग्वाहालि यायेत तयार दुगु धयादिल । नेपाःयात सम्पदाया गौरव जक मखुसे आर्थिक समृद्धिपाखें उन्मुख यायेगु सम्भावनापाखे न्ह्याःवने फयेमा धयादिसें वय्कलं भैसीपाटीया अस्पतालयात नेपाःया उत्कृष्ट अस्पताल दयेकेगु ज्या नं समाजपाखें सम्भव जुइफुगु खँय् बः बियादिल ।

नेपाः भारत दथुया शताब्दीयौंं पुलांगु धार्मिक, सांस्कृतिक स्वापूयात सम्मान यासें थनया सम्पदा संरक्षण व विकासनापं आत्मिय स्वापूया निरन्तरता नितिं भारत सरकार सदां सकारात्मक दूगु राजदूत पुरीं न्ह्यथनादिल । वय्कलं भारतीय राजदूतावासपाखें समाजनापं सहकार्य यानाः न्ह्याःगु सम्पदा पुनःनिर्माणयात निरन्तरता बिइगुलिइ बः बियादिल ।

समाजया नायो बुद्धिराज बज्राचार्यं सम्राट अशोक व चारुमतीया इतिहास स्मरणयासें यलया प्यखेरं प्यगः मू स्तुपा स्थापना याःगु इलंनिसें यल नगर व भारतया थःथवय् ग्वाहालिया स्वापू दूगु खँय् बः बियादिल ।

पूर्व संस्कृतिमन्त्री जुयादी धुंकुम्ह नायो बज्राचार्यं सरकार व स्थानीय तहपाखें भुखाचं पीडितपिनिगु पुनःस्थापना व क्षतिग्रस्त सम्पदाया पुनःनिर्माणय् माःगु कथं ध्यान तयेमफूगु न्ह्यथनादिल । वय्कलं जनप्रतिनिधिपिन्सं थनया संस्कृति, सम्पदा स्वःवइपिं पर्यटकत महानगरपालिकाया मू आम्दानी जुलं नं थुकिया संरक्षणय् माःकथं न्ह्यज्याःगु खनेमदूगुलिं चिन्ता प्वंकादिल ।

समाजपाखें भारतीय राजदूतावासया ग्वाहालि व भौतिक योजना मन्त्रालय, शहरी विकास मन्त्रालय नापं ललितपुर महानगरपालिकाया प्राविधिक ग्वाहालि कयाः ८ करोड लागत दुतिनाः पुरातात्विक महत्वया १६ गू सम्पदा पुनःनिर्माण ज्या क्वचायेके धुकूगु दु । न्हापांगु चरणय् शंखमूलया घाट पुनःनिर्माण, दौबहाःया कलात्मक ध्वाखा निर्माण, यलमुली त्वाःया चपाःछेँ पुनःनिर्माण, इन्द्रायणी पार्क दुनेया फल्चा निर्माण, मच्छिन्द्रबहाःया कलात्मक ध्वाखा, फल्चा व दुनेया बगैँचा निर्माण, लोकाकिर्ति महाविहार मर्मत व नापीचन्द्र महाविहारया पुनःनिर्माण जुगु दु ।

निगूगु चरणय् नागबहाः टोल सुधार समितिया छ,ेँ भिन्द्योलाछी चपाःछेँ, लुखुसी फल्चा व कुलदेवताया आगँ छेँ,  श्रीवच्छ महाविहार आःजु निवास निर्माण, मयूरवर्ण महाविहार दिगि छेँ, बुंगमतीया गंगा पोखरी व श्रीमहायान बौद्ध धर्म समाज गुम्बा खोकनाया पुनःनिर्माण ज्या जुयाच्वंगु दु ।

समाजं स्वंगूगु चरणया योजनायात ५गू करोडया लागतय् लोटस रिर्सच सेन्टरया कलेज भवन, विश्वकर्मा देगः व जिवित देवी कुमारी निवासया पुनःनिर्माण यायेगु योजना पेस याःगु दु ।

समाजया दँ मँुज्यासं सल्लाहकार परिषदया नायः रामलाल श्रेष्ठ, अम्बिका श्रेष्ठ,  मानार्थ दुजःपिं एनआरएनया संस्थापक नायः उपेन्द्र महतो व पुरातत्व विभागया महानिर्देशक भेषनारायण दाहालं नुगः खँ तयादीगु खःसा ज्याझ्वःसं थीथी क्षेत्रया प्रतिष्ठित व्यक्तित्वपिं, सभासद चन्द्र महर्जन, सिद्धिलाल सिं, पूर्व प्रधानसेनापति रुकमांगत कटवाल लगायत थीथी समाजया प्रतिनिधिपिनिगु उपस्थिति दुगु खः ।

किपा ः राजेन्द्र शाक्य

Categorized in राष्ट्रिय