nepal life

समेबजिया ६५० ब्वय् मिसाम्ह हनुमान पिहाँ वल

नेवा: अनलाइन न्युज – ललेन्द्र शाक्य | २०७४ कार्तिक २६, आइतबार ११:१५:४२

नेपालभाषाया ज्याझ्वःयात बांलाक्क थाय् बियाः वयाच्वंगु ईमेज च्यानल टेलिभिजनय् क्यनाः वयाच्वंगु नेवाः ज्याझ्वः “समेबजि”या ६५० ब्वः थ्यंगु लसताय् यलया जाह्वलाःख्यलय् च्वंगु लभ्ली ब्यांक्वेटय् शनिवाः छगू लसता ज्याझ्वः जूगु दु ।

नेपालभाषाया न्हापांम्ह सिने पत्रकारकथं कयातःम्ह नांजाम्ह सिने पत्रकार विजयरत्न असंबरेया विशेष उपस्थितिइ न्ह्याःगु “समेबजि”या ६५० ब्वः थ्यंगु लसता ज्याझ्वलय् थःगु नुगःखँ तयेगु झ्वलय् भाजु असंबरें नेपालभाषाया ज्याझ्वः गुलितक्क लोकंह्वाः धइगु खँया दसू ‘समेबजि’ खः धकाः धासे आः नं रहर व भावनां जक न्ह्याना च्वनेगु मखुसे आर्थिक रुपं नं तिबः जुइकथं सांगितिक व संकिपा ख्यलय् ज्याः न्ह्याकेमाःगु खँय् बः बियादिल ।

“समेबजि”या च्वमि व निर्देशक सुरेन्द्र मानन्धर लिसेलिसें रेवन्तलाल श्रेष्ठ, रजनी खड्गीपिन्सं न्ह्याइपुसे च्वंगु लकसय् न्ह्याकूगु “समेबजि”या ६५० ब्वः थ्यंगु लसता ज्याझ्वलय् कलाकार गोबिन्द ह्युमत, दीपा महर्जन, मोहनकृष्ण श्रेष्ठ, सुरज साय्मि, सुनिता मानन्धर, एलिना मानन्धर, सलिलसुन्दर तुलाधर लिसेलिसें थीथी कलाकारपिन्सं म्ये हालादीगु खःसा रोज महर्जन मय्जुं हनुमान जुया प्याखँ हुलादीगु खः ।

अथेहेतुं राजन शाही व सन्ध्या खडगीपिन्सं नं हुला प्याखँ न्ह्यब्वयादीगु उगु लसता ज्याझ्वलय् अन झायादीपिं पाहाँपिं दथुइ “समेबजी”या छगू लोकंह्वाःगु अंशया रुपय् धस्वानाच्वंगु क्वाः कासाः नं म्हितूगु खः ।

Categorized in कला