nepal life

सप्तरी ससफोया उम्मेदवारयात छुरा प्रहार, छ्यनय् व ल्हातय् घाःपाः

नेवा: अनलाइन न्युज | २०७४ मङ्सिर १९, मंगलबार १४:४६:४१

म्हमस्यूगु पुचलं वंगु चान्हय् सप्तरीया बलान बिहुल गाँउपालिकाय् च्वंगु बिहुल खुसिया सिथय् छम्ह उम्मेदवारयात छुरा प्रहार याःगु दु ।

उगु गाउँपालिकाया कमलदाहापाखें घरदैलो क्वचायेकाः लिहाँ वयेगुु झ्वलय् बहनी थ्यंमथ्यं १० ता इलय् संघीय समाजवादी पार्टी नेपालया पाखें सप्तरी क्षेत्र नम्बर ४ ‘ख’या प्रदेशसभाया उम्मेदवार जुयादीम्ह मोसहमुद अलीयात छुरा प्रहार जूगु दु । छुरा प्रहारपाखें उम्मेदवार अलीया छ्यनय् व ल्हातय् घाःपाः जूगुलिं स्थानीय क्लिनिकय् वासः जुयाच्वंगु प्रहरीं जानकारी ब्यूगु दु ।

घरदैलो ज्याझ्वः लिपा मोटरसाइकलपाखें छेँय् लिहाँ वनेगु झ्वलय् ल्यूनेपाखें निगः मोटरसाइकलय् वःपिं स्वम्हेसिगु पुचलं मोटरसाइकल दिकाः थःत छुरा प्रहार याःगु उम्मेदवार अलीं धयादीगु दु ।

उगु पुचलं आकाझाकां ल्यूनेपाखें छुरा प्रहार यायेधुंकाः मोटरसाइकलं कुतुंवंगुलिं नं थप आक्रमण याःगु खः धकाः उम्मेदवार अलीं धयादी । वय्कलं धयादी, “वधुंकाः थःलिसे मोटरसाइकलय् ल्यूने च्वनावःम्ह थः ग्वाहालिमि छुं तापाक्क बिस्युं वनाः ग्वाहालि फ्वसें प्रहरीयात खबर यायेधुंकाः इपिं बिस्युं वंगु खः ।”

Categorized in दुर्घटना-अपराध