nepal life

सनराइज बैंकया ठगीधन्दा

नेवा: अनलाइन न्युज | २०७४ पौष ९, आइतबार १२:५५:२३

थःत अब्बल दर्जाया बैंक धासें प्रचार यानाः वयाच्वंगु सनराइज बैंकं ग्राहकपिन्त ठगेयायेगु ज्या याःगु खुलासा जूगु दु ।

सनराइज सेफ डिपोजिट लकर सुविधा, भिसाडेबिट कार्ड, मोबाइल बैंकिङ्ग, इन्टरनेट बैंकिङ्ग, रेमिट्यान्स, सनराइज माइक्रो बैंकिङ्ग लिसेंया आधुनिक बैंकिङ्ग सेवात लिसेंया आकर्षक नारातपाखें उगु बैंकं ग्राहकपिन्त आकर्षित यायेगु व ठगी यायेगु ज्या यासें वयाच्वंगु छम्ह ग्राहकं गुनासो प्वंकूगु दु ।

सनराइज बैंकपाखें कम्पनीया शेयर भरेयायेबलय् छ्यलीगु आश्वा सेवापाखें ग्राहकपिन्त ठगी यानाच्वंगु प्रमाण लुयावःगु दु । मेमेगु फुक्क बैंकय् निःशुल्क दूगु आश्वा सेवाय् सनराइज बैंकं शुल्क कयाः वयाच्वंगु खः ।

अजूचायापूगु खँ छु धाःसा उगु आश्वा शुल्क तकं बैंकया शाखाकथं ब्यागलं ब्यागलं जूगु सीदूगु दु । सनराइज बैंक तीनकुने शाखाय् आश्वा सेवा छ्यःगु बापत सच्छि तका शुल्क कायेगु यानाच्वंगु दुसा वहे सेवा यल शाखापाखें न्यय्तका दां शुल्क कयाच्वंगु दु ।

थथे बैंकं लाक्वपाक्व ढंगं शुल्क कयाच्वंगुलिं बिहिवाः सनराइज बैंक तिनकुने शाखाय् ग्राहकपिन्सं विरोध प्वंकूगु खः । तर, बैंकया कर्मचारीपिन्सं थ्व बैंकया नियम खः, जिमिसं छुं याये मफु बरु मेमेगु बैंकय् सरे या धासें धम्की ब्यूगु छम्ह ग्राहकं धाःगु दु ।

थथे ग्राहकपिं बैंकपाखें प्रताडित जूगु बुखँ वयेधुंकाः उगु बैंकया केन्द्रीय ज्याकुथिया ४००४५६० स फोन यानाः जानकारी काःबलय् सम्बन्धित शाखा प्रमुख सम्पर्कय् वये चाहेमजूगु खः ।

तःक्वःमछि फोन याःबलय् तकं प्रमुख सम्पर्कय् मवयेधुंकाः थःपिन्त सहायक कर्मचारी धाःम्ह कमला तिम्सिनां बैंकं आश्वा सेवाय् शुल्क कयाः वयाच्वनागु स्वीकार याःगु खः । वयक्लं बैंकया शाखां निःशुल्कनिसें सच्छि तका तक आश्वा सेवा शुल्क बापत कायेफूगु धाःगु खः ।

थथे छगू हे बैंकय् ग्राहकपिन्त ब्यागलं ब्यागलं नियम दयेकूगु बैंकयात छाय् कारवाही मयात ? राष्ट्र बैंक छाय् न्हाय्पनय् चिकं तयाः च्वनाच्वंगु दु ?  अख्तियार दुरुपयोग अनुसन्धान आयोग छाय् मौन च्वन ? अथेहे, जनताया पीरमर्का थुइकीम्ह हेलो सरकार छु स्वयाच्वंगु दु ? ग्राहकपिनिगु गुनासो खः ।

(क्षेप्यास्त्र वाःपौ पाखें)

Categorized in पत्रपत्रिका