nepal life

संसारया दकले अप्वः चिकुइगु थाय्, –५६ डिग्री सेल्सियससिबें म्हो तापमान

नेवा: अनलाइन न्युज – नेवा: | २०७४ पौष २०, बिहिबार १५:४७:०१

संसारया दकले ख्वाउँगु व चिकूगु थाय् सायद सकस्यां मसीफु । उगु थाय्या नां ‘याकूत्स्क’ खः । उगु थाय् रुसया सुदूर सहरय् लाः । चिकुलाया इलय् मेगु देसया तापमान २, ३ व ४ डिग्रीया जःख जुइसा याकूत्स्क थाय्या तापमान माइनस ५० (–५०) डिग्री सेल्सियससिबें नं म्हो जुइगु याः । रुसया आर्कटिक रेखापाखें केवल ४५० किलोमिटर दक्षिणय् लाःगु उगु शहर लेना खुसिया किनारय् दु । थ्वहे हुनिं यानाः उगु शहरयात ‘पोर्ट सिटी’या नामं नं म्हसीकेगु याः ।

याकूत्स्कया जनसंख्या २,५०,००० दु । उगु शहरया पलिस्था १६३२ स सजूगु खः । तर १८८० व १८९० या दशकय् अन दइगु लुँ व खनिज पदार्थया भण्डारं उकियात लोकप्रिय याःगु खः । उगु दिंनिसें अन मनूत च्वनेगु क्रम तीब्र रुपं अप्वःगु खः । सुचं कथं शाखा गणतन्त्रया उगु शहर तुर्क–मूलया याकूत व्यक्तिपिनिगु मातृभूमि खः । इपिं अन १३ औ व १४ औं शताब्दीइ बयकाल झीलया सिथं अन वयाः बसोबास याःगु खः ।

सन् १६३२ स रुसी राज्यया विस्तार पश्चात बसाई थनतक थ्यनेधुंकाः प्योत्र बेकेतोवं छगू किल्लाया निर्माण याःगु ुखः । वधुंकाः १८८०–१८९० कालय् उगु क्षेत्रपाखें लुँ व खनिज पिकाःगु खः । उगु ईनिसें अन बस्तीया तीब्र रुपं विस्तार जूगु खः ।

अन चिकुलाया ई १८ नोभेम्बरनिसें सुरु जुयाः १ माचतक जुइ । उगु हे इलय् औसत तापमान माइनस २३ (–२३) डिग्री सेल्सियस जुइगु याः । १३ जनवरइ दकले अप्वः चिकुइगु खः अन । उगु इलय् अधिकतम तापमान माइनस ३६ (–३६) डिग्री सेल्सियस व न्यूनतम माइनस ४१ (–४१) डिग्री सेल्सियस जुइ । तःक्वःमछि अनया तापमान माइनस ५६ (–५६) डिग्री सेल्सियसतक थ्यनेगु याः ।

Categorized in अन्तर्राष्ट्रिय