nepal investment baink

संकिपा धइगु ‘एभरग्रीन जब’ मखु – भिंतुना

भिंतुना जोशी छम्ह तसकं लोकंह्वाःम्ह हिरोइन खः । यांमिखा, याकःम्ह्याय्, मतिनाया कलि, लय्, त्याग, थ्वला ग्यानापु स्टायल, मू मदुगु जिन्दगी लगायत नीगू ति फिल्म म्हिते धुंकूम्ह भिंतुना जोशी छुं ई न्ह्यः दुबई वनावःगु खः । थौंकन्हय् भिंतुनां छु यानाच्वंगु दु अले दुबइलय् छु याना वल धइगु विषयस जूगु खँल्हाबल्हा – 

भिंतुनाजु, थौंकन्हे छु यानाच्वना दिया ले ? 

  • थौंकन्हेला खास हे छुं मदु । ‘फ्री’ हे खः । अथेजूगुलिं पासापिं नापलायेगु व परिवारनाप लायेगु ज्याय् हे लानाच्वंगु दु । उकिसनं जि दुबई वनाः लिहां वयागु नं ताः मदुनि । लिहां वःसांनिसें थन नखःचखः मौसमशुरु जुल । गब्लें पाहाँचःह्रे धाल । गब्लें जन्बहाःद्यःया जात्रा धाल । 

थजाःगु जात्रा अले तजिलजि छितः गुलितक यः ले ? 

  • जितः झीगु नेवाः तजिलजि व जात्रा साःप हे यः । अले जात्रा स्वयेगु नं याना । थुगुसी जनबहाःद्यःया जात्रा खुनु ला जिमिसं साःप हे न्ह्यइपुका । 

अथे धकाः छु यानादिया ? 

  • मेगु छु यायेगु धकाः ? जात्रा स्वः वना । पासापिं नाप लाना । नखत्या हना । झन् जनबहाःद्यः लाय्कुलिइ याः न्यायेकूगुया कन्हे खुनु हे लसता दिदी दिल्ली वने त्यंगुलिं यानाः जिपिं तताकेहें परिवारनाप जानाः नखः हना । न्ह्याइपुका । 

गब्ले छिकपिनि तता दिल्ली झायादी, गबलें छिकपिं निम्हं दुबई झायादी । छु छिकपिं येँय् च्वने मछू ला ? 

  • अथे मखु, ! येँ धइगु झीगु मातृभूमि खः । थःगु भूमि स्वयात मयइ । जिमित नं यः । तर थ्व सयेकेगु सिइकेगु व छुं याना क्यनेगु ई खः । थःगु भविष्यया निंतिं जग स्वनेगु ई खः । उकिं विदेशय् वनेमाःगु खः । लसता दिदीया दिल्लीइ छगू फेमिली रेष्टुराँस म्ये हालेगु बांलाःगु “जब” दु । जिपिं दुबई वनाबले नं लसता दिदीं अन अज्याःगु हे बांलाःगु फेमिली रेष्टुराँस म्ये हालेगु जब यानादिल । 

 

भिन्तुना जाेशी

  • अले भिंतुना ले ?
  • जिं अन छगू ब्यूटी पार्लरय् ज्या याना । ब्यूटिशियनया ट्रेनिङ्ग कया । दुबईया ब्यूटी पार्लर धाल कि संसारय् हे नां जाः । जिं अन इलेग्यान्स नांयागु छगू ब्यूटी पार्लरय् ब्यूटिशियनया ट्रेनिङ्ग कया । सकसिनं जितः छम्ह एक्ट्रेस धकाः जक म्हसिउ । वास्तवय् जि छम्ह ब्यूटिशियन नं खः । अले हाकनं छम्ह एक्टेसया एक्टिङ्ग आयु उलि ताहाकः जुइमखु । वैंश वन कि रोल धइथें चूलाके फइमखु । ब्यूटिशियनया ज्या धइगु ला “एभरग्रीन” ज्या खः । सदां दया च्वनीगु ज्या खः । हाकनं जिगु न्हापांनिसेंया इन्ट्रेष्ट नं खः । उकिं अन ट्रेनिंग कया । जितः ला तसकं बांलाः ताल अनया ट्रेनिङ्ग । 

दुबई यंकाः मिस्तय्त मखुगु ज्याय् लगे याये यः धकाः धाइ, भिंतुना अन च्वनाबलय् अज्याःपिं सुं नेपाःमि मिस्त नाप लाः ला ? 

–अहं मलाः । जिमिसं नाप लाःपिं मिस्त ला अन कि त रेष्टुराँस वेटर ज्या यानाच्वंपिं अले गुलिं शपिंग मलय् सेल्स गर्ल जुयाः ज्या यानाच्वंपिं खना । गुलिं फेमिलि नाप च्वनाच्वंपिं नं नापलात । तर अथे थःगु जोवन मिइपिं छम्ह नं नाप मलाः । 

दुबई गथे ताल ले ? 

  • साप हे बांलाः ताल । दुबई धाल कि आपाःसिनं नेगेटिभ बिचाः याइ । तर अथे मखु । अनया नियम कानुन बांलाः । शहर बांलाः । सिष्टम बांलाः । सिष्टमय् च्वना ज्याः याइपिन्त सरकारं बीगु सुविधा बांलाः । उकिं जितः ला दुबई साःप हे यः ताल । 

अय्सा छु आः फिल्मय् ज्या मयासे ब्यूटिशियन हे जुया छ्वयेगु बिचार ला कि ?

  • मखु मखु । फिल्म नं म्हितेगु । तर फिल्म म्हितेगु धायेवं लाथेपाथे म्हिते मजिल । बांलाःगु फिल्म म्हिते माल । जिगु निगू फिल्म ला पिहाँ वये हे ल्यं दनि । छगू नेवाः फिल्म ‘मनू म्हसीकि” अले मेगु खस नेपाली भाय्या फिल्म “भ्रम” । थ्व निगुलिं साःप हे बांलाःगु फिल्म खः । 

बांलाःगु फिल्म म्हितेगु धाल । गथे जुल कि फिल्म बांलाइ थें च्वं, छक्वः धयादी ला ? 

  • खास यानाः फिल्म मेकरत अनुभवी जुइमाल । स्कृप्ट बांलायेमाल । अले बांलाक फिल्म दयेकेगु कुतः यायेमाल । जिं ला फिल्मया को–स्टार सु धकाः सिबें जिगु रोल गुलि बांलाः धइगु स्वया: जक फिल्म म्हितेगु यानाच्वनागु दु । 

खस नेपाली भाय्या फिल्म नं म्हितादिल । आः छु नेवाः फिल्मयात माया मारे यानादीगु ला कि ? 

  • मखु मखु । अथे गथे याना फइ । जिगु ला म्हसिका धइगु हे नेवाः फिल्मं ब्यूगु खः । हाकनं थ्व जिगु मांभाय् नं खः । मांभाय् व मातृभूमि सकसितं यइ । जितः नं यः ।

 

  • भिन्तुना जाेशीथौंकन्हय् गुलि व्यस्त ले ? 
  • व्यस्त धकाः व्यस्त नं मखु । थौंकन्हय् खास यानाः जिगु न्हूगु नेवाः फिल्म ‘मनू म्हसीकि’या प्रमोशनया ज्याय् भचा लगे जुयाच्वनागु दु । आः लाबला लिपा हे थ्व फिल्म रिलिज जुइत्यंगु दु उकी प्रचारप्रसारपाखे ला ध्यान बिइ हे माल । 

दकलय् लिपा, थ्व नेवाः अनलाईन न्यूज गथे ताल ले ? 

  • थौंकन्हय्या संसार धइगु हे अनलाइनया संसार खः । यानिकि ‘वेबवल्र्ड’ खः । वेब बिना जीवन कल्पना याये हे फइथें मच्वने धुंकल । संसारय् दक्व भाय्या वेबसाइट दु । आः नेवाः अनलाइन न्यूज नं वल । जितः ला साःप हे यःताल । उलि बांलाक्क स्वये ला मलाःनि । तर स्वया च्वनागु दु । थ्व अझ बांलाना वनी थें च्वं जितः । 

(थुकथं भिंतुना जोशीं थःगु दुबई यात्रा व थौंकन्हय् थः छु याना च्वनागु दु धइगु बारेया खँ कनादिल ।)

न्ह्यब्वःम्ह – असंबरे