नेवा: अनलाइन न्युज | २०७४ कार्तिक २४, शुक्रबार १२:३८:३३

थौं शुक्रवाः सुथय् नवलपरासीया सुक्रौली धैगु थासय् छगः स्कूल बस दुर्घटनाग्रस्त जूगु दु ।

चितवनया भरतपुर महानगरपालिका–१६य् च्वंगु देवज्योति आधारभूत विद्यालयपाखें शैक्षिक भ्रमणय् विद्यार्थीपिं ज्वनाः वंगु बस दुर्घटना जुयाः ४० म्ह विद्यार्थी घाःपाः जूगु दु । उगु बस शुक्रवाः सुथय् थ्यंमथ्यं १० ता ईपाखें दुर्घटनाग्रस्त जूगु खः ।

भुमही भैरहवा सतकखण्ड अन्तर्गत रामग्राम–१५ सुक्रौलीइ बसया पट्टा त्वःल्हुयाः अनियन्त्रित जुयाः लँपु लिक्क च्वंगु गालय् कुतुंवंगु प्रहरीं जानकारी ब्यूगु दु ।

घाःपाः जूपिंमध्ये न्याम्हेसिगु अवस्था तःच्वः जूगुलिं वासः यायेगु नितिं भरतपुर छ्वःगु खः । सामान्य घाःपाः जूपिनिगु जिल्ला अस्पताल परासीइ वासः जुयाच्वंगु दु । शैक्षिक भ्रमणया नितिं विद्यार्थीपिं लुम्बिनी वनाच्वंगु खः ।

Categorized in दुर्घटना-अपराध