nepal life

शुक्रवाःनिसें इतिहासये हे ख्वाउँगु ओलम्पिक न्ह्यात

नेवा: अनलाइन न्युज | २०७४ माघ २६, शुक्रबार १४:०४:४२

२३ क्वःगु विन्टर ओलम्पिक दक्षिण कोरियाया प्योङच्याङय् शुक्रवाःनिसें न्ह्याःगु दु । प्योङचाङय् उलेज्या समारोह भव्य रुपं जूगु दु ।

शुक्रवाःनिसें न्ह्याःगु उगु ओलम्पिक २५ फेब्रुअरीतक न्ह्याइ । दक्षिण कोरियाया १३ गू थासय् १५ गू कासाया धेंधेंबल्ला जुइ ।

१०२ स्वर्ण पदकया नितिं विश्वया स्वद्वःसिबें अप्वः कासामिपिन्सं धेंधेंबल्ला याइ । अथेहे, सन् २०१४ या ओलम्पिकय् शक्तिबर्धक वासः काःगु द्वपनय् प्रतिबन्ध जूम्ह रुसया १६९ म्ह कासामिं थुगु कासाय् स्वतन्त्र रुपं धेंधेंबल्ला याइ ।

थुगु ओलम्पिक न्हापांगुखुसि दक्षिण कोरियाय् ग्वसाः ग्वःगु खः । सिओलय् १९८८ स ग्रीष्मकालीन ओलम्पिक ग्वसाः ग्वःगु खः । तर, प्योङचाङ शीतकालीन ओलम्पिक ग्वसाः ग्वःगु दक्षिण कोरियाया न्हापांगु सहर जूगु दु ।

थ्वहे ओलम्पिकपाखें उत्तर कोरिया व दक्षिण कोरिया दथुइ सम्बन्ध सुधार जुइगु विश्वास याःगु दु । शत्रुतापूर्ण सम्बन्ध दूगु निगुलिं कोरियाली प्रायद्वीपया कासामिपिं थुगु ओलम्पिकय् छगू हे ध्वाँय् क्वय् वःगु दु । उलेज्या समारोहस निगुलिं कोरियाली कासामिपिन्सं छगू हे ध्वाँय् ज्वनाः मार्चपास याःगु दु ।

प्योङचाङ ओलम्पिक, इतिहासय् हे दकले ख्वाउँगु क्षेत्रय् जूगु न्हापांगु ओलम्पिक कासा तकं जूगु दु । बिहिवाः चान्हय् माइनस २० डिग्री रेकर्ड याःगु तापक्रम अझ नं म्हो जुइगु अनुमान याःगु दु ।

Categorized in कासा