nepal life

शिवशक्ति उद्योगय् शिलबन्दी, फेमिली चिकं गुस्तरहीन

नेवा: अनलाइन न्युज | २०७४ भाद्र २८, बुधबार १०:४२:२३

बारा जिल्लाया जितपुरय् च्वंगु शिवशक्ति उद्योगय् आपूर्ति व्यवस्था व उपभोक्ता संरक्षण विभागं शिलबन्दी याःगु दु । विभागं अनुगमन यानाः अखाद्य चिकं उत्पादन यानाः उद्योगं बजारय् मिइगु ज्या याःगु लुइकेधुंकाः उद्योगय् शिलबन्दी याःगु खः ।

येँपाखें वंगु विभागया पुचलं उद्योगय् छापा मारेयानाः मेगु निर्देशन मवःतले चिकं उत्पादन मयायेत व बजारय् मछ्वयेत निर्देशन ब्यूगु खः ।

उद्योगया उत्पादन फेमिली तू चिकं परीक्षणया झ्वलय् गुणस्तरहीन खनेदये धुंकाः विभागया शाखा अधिकृत मोहनकुमार पुडासैनीया नेतृत्वया पुचः अनुगमनया नितिं वंगु खः । उद्योगया उत्पादन क्षेत्रय् अनुगमन यासें पुचलं उद्योगयात चिकं उत्पादन व कारोवारय् रोक तःगु खः । मेगु निर्देशन मवःतले उत्पादन व मिइगु ज्याय् रोक तयेत निर्देशन ब्यूगु अधिकृत पुडासैनीं जानकारी बियादीगु दु ।

उद्योगं फेमिली व साजन तू चिकं उत्पादन यानाः वयाच्वंगु खः । वंगु साउनय् खाद्य प्रविधि व गुण नियन्त्रण विभागं फेमिली तू चिकंया स्याम्पल ज्वनाः परीक्षण याःबलय् चिकंया प्यारेक्साइट भ्याल्यू मापदण्डसिबें अप्वः लुइकूगु खः । नियम कथं प्यारेक्साइट भ्याल्यू १० जुइमाःथाय् ११ दशमलब ५ दूगु अधिकृत पुडासैनीं धयादिल ।

बजारय् मिइगु नितिं तयातःगु फेमिली चिकं, साजन, धारा व पतञ्जली चिकंया परीक्षण याःगुल फेमिली चिकं नयेगु नितिं पाय्छि मजूगु खनेदूगु पुडासैनीं जानकारी बियादिल ।

वंगु चैतय् उत्पादन जूगु चिकं खुलातक नये ज्यूगु जूसां नं प्यलाया दुने परीक्षण यायेगु झ्वलय् गुणस्तरहीन खनेदूगु शाखा अधिकृत पुडासैनीं धयादिल ।

उद्योग राष्ट्रिय प्रजातन्त्र पार्टीया समानुपातिक सांसद राजकुमार अग्रवाल व व्यवसायी सन्दीप कुमार काडियापिन्सं संचालन यानाः वयाच्वंगु खः ।

अनुगमन पुचलं शिवशक्ति घ्यूयाके नं मिसावट दूगु धासें गुनासोया आधारय् अनुगमन यायेत्यंसां नं उद्योगीपिन्सं अवरोध याःगु खः ।

उद्योगीं अनुगमनया नितिं थ्यंकूपिं पुचःयात गेटय् हे पनेगु कुतः याःगु खः । अनुगमनया नितिं विभागया पुचः थ्यंकूगु सुचं वयेधुंकः वःपिं उद्योगीपिन्सं विभागं रोक तयेत ब्यूगु निर्देशन पौ तकं बुझे यानाः कायेत अस्वीकार याःगु खः ।

उद्योगीपिन्सं अनुगमनय् पंगः थनेधुंकः विभागया पुचः हेटौंडा लिहां वंगु खः । अनुगमनया झ्वलय् स्थानीय प्रशासनं माःगु ग्वाहालि मयाःबलय् सोचे याःथें अनुगमन जुइमफूगु पुडासैनीं धयादिल ।

Categorized in बजाः