nepal life

विरामीपाखें आः अस्पतालं लाक्वपाक्व शुल्क कायेमदइगु !

नेवा: अनलाइन न्युज | २०७४ फाल्गुण २, बुधबार १७:०८:४६

स्वास्थ्य मन्त्रालयं नियमनया नितिं कार्यदल दयेकल

निजी अस्पतालतसें विरामीपाखें असुल याइगु अत्यधिक शुल्क नियमन यायेत स्वास्थ्य मन्त्रालयं कार्यदल नीस्वंगु दु ।

मन्त्रालयया चिकित्सा महाशाखा प्रमुख भोलाराम श्रेष्ठया संयोजकत्वय् कार्यदल नीस्वंगु खः । गुगु कार्यदलं स्वास्थ्य शुल्क निर्धारण याइगु मन्त्रालयया प्रवक्ता श्रीकृष्ण गिरीं जानकारी बियादीगु खः ।

कार्यदलय् स्वास्थ्य सेवा विभाग, औषधी व्यवस्था विभाग, अर्थमन्त्रालयया प्रतिनिधि, उपभोक्तावादी संघसंस्थाया प्रतिनिधि लिसेलिसेंया दुजःपिं दुथ्याः ।

आपूर्ति व्यवस्थापन व उपभोक्ता हित संरक्षण विभागं याःगु अनुगमनपाखें निजी अस्पतालतसें विरामीपाखें अत्यधिक शुल्क असुल यानाच्वंगु पुष्टि जूगु खः । वहे हुनिं सरकारं नियमनया तयारी न्ह्याकूगु खः । कार्यदलयात लच्छिया म्याद ब्यूगु दु ।

प्रवक्ता गिरीं धयादी, “कार्यदलं विरामीपाखें अस्पतालं कायेफइगु शुल्कया मापदण्ड तयार याइ । छु ल्वय्या वासः यायेगु नितिं गुलि शुल्क कायेदइ धैगु खाका बिइगु जुइ ।”

आः थौंकन्हय् अस्पतालतसें थः यत्थे विरामीपाखें शुल्क असुल यानाः वयाच्वंगु दु । स्वास्थ्य शुल्कबाहेक सरकारं आः विरामीपाखें ५ प्रतिशत स्वास्थ्य सेवा कर बाय् मूल्य अभिबृद्धि कर कायेगु याइ । वबाहेकया अतिरिक्त रकम असुल यायेगु कानूनी व्यवस्था मदु । सरकारं काइगु करय् तकं अस्पतालतसें बदमासी यानाच्वंगु दु ।

अतिरिक्त शुल्क काःगु लुइके धुंकाः आपूर्ति व्यवस्थापन व उपभोक्ता हित संरक्षण विभागं निला न्ह्यः येँया न्यागू अस्पतालबिरुद्ध ठगी मुद्दाय् छानविन यानाः मुद्दा दायर यायेत येँ प्रहरी परिसरयात पौ हे छ्वःगु खः ।

धापासीइ च्वंगु ग्रान्डी इन्टरनेशनल, ग्वार्कोय् च्वंगु बी एन्ड बी, बाँसबारीया नेशनल इन्स्टिच्यूट अफ न्युरोलोजिकल एण्ड एलाइड साइन्स न्यूरो अस्पताल, थापाथलीया नर्भिक इन्टरनेशनल व बसुन्धराया इसान बाल अस्पतालविरुद्ध मुद्दा न्ह्याकेत विभागं आग्रह याःगु खः ।

Categorized in राष्ट्रिय