nepal life

विप्लव कार्यकर्तायात कांग्रेसं संरक्षण यानातःगु दु ः प्रचण्ड

नेवा: अनलाइन न्युज | २०७४ कार्तिक २७, सोमबार १२:०४:४३

नेकपा माओवादी केन्द्रया नायः पुष्पकमल दाहाल प्रचण्डं थः उम्मेदवारपिन्त बम आक्रमण याःम्ह नेत्रविक्रम चन्द विप्लव नेतृत्वया नेपाल कम्युनिष्ट पार्टीया कार्यकर्तापिन्त सरकारं हे संरक्षण याःगु गम्भीर द्वपं ब्यूगु दु ।

सोमवाः सुथय् चितवनया शिवनगरय् च्वंगु थःगु हे निवासय् संचारकःमिपिं लिसे खँ ल्हासें चितवन ३ या वाम उम्मेदवार तकं जुयादीम्ह प्रचण्डं सरकारया संरक्षणय् विप्लव नेतृत्वया नेकपाया कार्यकर्तापिन्सं माओवादी उम्मेदवारपिनत आक्रमण याःगु द्वपं बियादीगु दु ।

आक्रमणकारीपिन्त प्रहरीं ज्वंगु इलय् त्वःतेत माग यासें सरकारया हे राज्यमन्त्री व रोल्पा कांग्रेसया सभापति अमरसिंह पुनं विज्ञप्ति पिकाःगुलिं उकिया पुष्टि जुइगु प्रचण्डं दाबी यानादीगु खः ।

प्रचण्डं धयादी, “ल्वाभःलिसें गिरफ्तार जुल, विप्लवलिसे सम्बन्धित मनूत । अमरसिंह पुन आः मन्त्री जुयाच्वंगु दु वहे रोल्पाया । वय्लकं वक्तव्य पिकयाः त्वःति इमित धयादीगु दुसा थथे धायेधुंकाः प्रष्ट हे खनेदत नि । तालमेल जूगु दु लोकल कांग्रेसया ।”

रोल्पा कांग्रेसया सभापति अमरसिंह पुनः आः सिँचाइ राज्यमन्त्री खः । वय्कः प्रतिनिधिसभा निर्वाचनय् रोल्पापाखें माओवादी नेता बर्षान पुन अनन्तलिसे चुनावी प्रतिस्पर्धाय् दु ।

रोल्पाय् शनिवाः वर्षमान पुन अनन्तयात लक्षित यानाः माइन विष्फोट याःगु खःसा आइतवाः ल्वहँ मुंकाः लँपु अवरुद्ध यासें गोली प्रहार याःगु खः । उगु ज्याय् दुथ्याःगु धासें प्रहरीं विप्लव लिक्कया सुं सुं कार्यकर्तापिन्त वहे थासं गिरफ्तार याःगु खः । वधुंकाः कांग्रेस रोल्पाया सभापति तकं जुयादीम्ह सिँचाइ राज्यमन्त्री अमरसिंह पुनं विज्ञप्ति पिथनाः गिरफ्तारय् लाःपिन्त त्वःतेत माग याःगु खः ।

प्रचण्डं थुज्वःगु गतिविधि पनेत प्रधानमन्त्री व कांग्रेस सभापति शेरबहादुर देउवायात सुझाव तकं बियादीगु दु ।

थ्वहे झ्वलय् पश्चिम चितवनया शारदानगरय् जूगु चुनावीसभायात सम्बोधन यासें नायः प्रचण्डं स्थानीय तहया निर्वाचनया इलय् भरतपुर १९ स जूगु घटनापाखें शिक्षा कासें थुज्वःगु घटना हाकनं मजुइकेगुलि बः बियादीगु खः ।

भरतपुर महानगरपालिका वडा ल्याः १९ स जूगु मतपत्र खुइगु घटना इतिहासया हे दुर्भाग्यपूर्ण जूगु धासें प्रचण्डं धयादी, “वडा ल्याः १९ नेपाःया चर्चाया विषय जुल, उगु इलय् गुगु घटना जुल, व इतिहासया हे दुर्भाग्यपूर्ण घटना खः, वपाखें झीसं शिक्षा कायेमाः, उज्वःगु घटना वइगु निर्वाचनय् जुइके बीमज्यू ।”

स्थानीय तहया निर्वाचनया इलय् भरतपुर–१९ या मतगणनाया झ्वलय् गणनास्थलय् हे माओवादी कार्यकर्तां मतपत्र खुनाब्यूगु खः । वधुंकाः अन हाकनं मतदान जूगु खः ।

Categorized in राजनीति