nepal investment baink

विनोद खन्ना व वय्कःया बारे २० गू न्ह्याइपुगु खँ

नेवा: अनलाइन न्युज | २०७४ बैशाख १४, बिहिबार १३:५९:५१

१) विनोद खन्नाया जन्म ६ अक्टुबर १९४६ स पेशावर (पाकिस्तान)य् जूगु खः । विनोद खन्नाया अबु टेक्सटाइल, डाई व केमिकलया विजनेस याइम्ह खः ।

२) विनोद खन्नाया न्याम्ह दाजुकिजा–तःकेहेँपिं मध्ये छम्ह किजा व स्वम्ह तःकेहेँपिं दु । आजादीया इलय् पाकिस्तान–भारत–बंगलादेश ब्यागलं ब्यागलं देश जुइधुंकाः खन्ना छेँजःपिं पाकिस्तानं भारतया मुम्बईस च्वंवःगु खः ।

३) विनोद खन्ना मचाबलय् तसकं मछाःम्ह मनू खः । स्कूल ब्वनाच्वंगु इलय् विनोद खन्नायात छम्ह टीचरं जबरजस्ती नाटकय् म्हितकूगु खःसा उबलेनिसें खन्नायात अभिनयया कला यःगु खः ।

४) बोर्डिङ स्कुलय् ब्वनाच्वंगु इलय् विनोद खन्नां ‘सोलवां साल’ व ‘मुगल–ए–आजम’थें जाःगु संकिपा स्वःगु खःसा उगु हे संकिपापाखें खन्नाया कला जीवनय् तच्वकं लिच्वः लाकूगु खः ।

५) विनोद खन्नाया अबुयात मयःगु जुयाच्वन कि थः काय् विनोद संकिपाय् म्हितीगु । विनोद खन्नाया जिद्दीया न्ह्यःने अबुम्हं छुं याये मफुत व अबुम्हं विनोद खन्नायात निदँया ई ब्यूगु खः । विनोद खन्नां वहे निदँया दुने अतिकं मेहनत यानाः संकिपा इन्डष्ट्रीइ थःगु थाय् दयेकेत ताःलाकल ।

६) विनोद खन्नायात अतिकं यःम्ह कलाकार राजेश खन्ना खः ।

७) हेण्डसम विनोद खन्नायात सुनिल दत्तं सन् १९६८ स ‘मनका मीत’ संकिपाय् भिलेनया रुपं म्हितकाः संकिपा ख्यलय् लञ्च याकूगु खः । थुगु संकिपा सुनिल दत्तं थः किजायात हिरो यायेगु नितिं दयेकूगु खः । तर सुनिल दत्तया किजा ल्यूने लात तर विनोद खन्ना न्ह्यःने लात थुगु संकिपां ।

८) हिरोया रुपं स्थापित जुइ न्ह्यः विनोद खन्नां ‘आन मिलो सजना’, ‘पूरव और पश्चिम’, ‘सच्चा झुठा’थें जाःगु संकिपाय् सहायकया खलनायकया रुपं अभिनय याःगु खः । गुलजारं निर्देशन याःगु सन् १९७१ स ‘मेरे अपने’ संकिपापाखें विनोद खन्ना आपालं चर्चाय् वःगु खःसा छम्ह बांलाम्ह नायकया रुपं न्ह्यःने वःगु खः ।

९) विनोद खन्ना मल्टीस्टार संकिपापाखें लिक्क लाः वन व उगु ईया स्टार कलाकारपिं अमिताभ बच्चन, राजेश खन्ना, सुनिल दत्त आदिपिंलिसे संकिपा म्हितेगु ह्वताः चूलाकल ।

१०) अमिताभ बच्चन व विनोद खन्नाया जोडीयात आपालं स्वकुमिपिन्सं य्येकूगु खः । संकिपा ‘हेराफेरी’, ‘खून पसीना’, ‘अमर अकबर एन्थोनी’, ‘मुकद्दरका सिकन्दर’, ब्लाकबस्टर साबित जुल । 

११) सुपर स्टार कलाकार जुयाच्वंगु इलय् सन् १९८२ स विनोद खन्नां आकाझाकां थुज्वःगु फैसला यात कि संकिपा इन्डष्ट्रीइ हे हलचल जुल । विनोद थः आध्यात्मिक गुरु रजनीश (ओशो)या शरणय् वन व ग्लेमरया दुनियाँयात खन्नां बाई–बाई यानाबिल । ओशोया आश्रमय् फिल्मीस्टार विनोद खन्नां भाडा सिलेगु व मालीया ज्या यात ।

१२) विनोद खन्नाया आकाझाकां थुकथं ओशो आश्रम वंगु हुनिं खन्नाया जहान गीताञ्जली तँ चाल व निम्हेसिगु दथुइ सम्बन्ध विच्छेद जुल । विनोद व गीताञ्जलीया निम्ह काय् अक्षय खन्ना व राहुल खन्ना खः ।

१३) सन् १९९० स विनोद खन्ना कवितालिसे ब्याहा यात । कविता व विनोदया छम्ह काय् साक्षी व छम् म्ह्याय् श्रद्धा दु ।

१४) संकिपाप्रति विनोदयाके हाकनं मतिना ब्वलनाः वल व सन् १९८७ स बिनोद खन्नां ‘इन्साफ’ संकिपा म्हिताः हाकनं संकिपा ख्यलय् लिहां वल । ४–५ सालतक नायक जुइधुंकाः विनोद खन्ना बुलुहुँ चरित्र भूमिकाय् म्हितेगु यानाहल ।

१५) विनोद खन्ना सलमान खानलिसे आपालं संकिपाय् खनेदूगु खः । सलमान खानं विनोद खन्नायात थःगु नितिं लक्की कथं काइगु खः ।

१६) विनोद खन्ना मू भूमिका म्हितेगुलिं आपालं पाय्छिम्ह कलाकार कथं धस्वायेत ताःलाःगु खः ।

१७) छगू अन्तर्वार्ताया झ्वलय् विनोद खन्नां धाःगु दु कि थःगु इलय् नं हिरो फिट जुइगु खः तर बडी क्यनेगुया ट्रेण्ड मदु ।

१८) विनोद खन्ना संकिपाय् स्टाइलिस अभिनेताया रुपं म्हिता वइम्ह खः ।

१९) विनोद खन्ना अभिनेताया लिसेलिसें निर्माता व सक्रिय राजनेता नं खः । खन्ना भारतीय जनता पार्टी (भाजपा)या दुजः खःसा आपालं चुनाव त्याकेधुंकूम्ह खः । वय्कः मन्त्री तकं जुयादी धुंकूम्ह व्यक्ति खः ।

२०) विनोद खन्नायात सन् १९९९ स संकिपा इन्डष्ट्रीइ ज्वःमदुगु योगदान बियादीगुलिं फिल्मफेयर लाइफटाइम एचिभमेन्ट अवार्डपाखें सम्मान याःगु खः ।

Categorized in कला