नेवा: अनलाइन न्युज | २०७४ माघ ५, शुक्रबार १६:३६:२२

जापान, अमेरिका, पोर्चुगल, सिंगापुर लिसेंया देसय् छ्वयाबिइ धकाः करोडौं तका दां ठगी याःम्ह मनू ज्वंगु दु । गिरफ्तारीइ लाम्ह मनू नुवाकोट छेँ जुयाः थौंकन्हय् यलया तिखेदेगलय् च्वनाः वयाच्वंम्ह ३९ दँया पारस लोहनी खः ।

पीडितपिनिगु उजुरीया आधारय् ठग पारस लोहनीयात महानगरीय अपराध अनुसन्धान महाशाखाया पुचलं येँया सोह्रखुट्टेपाखें ज्वंगु खः । पारस लोहनीं थीथी देसय् आकर्षक सेवा सुविधालिसेंया रोजगारी बिइगु धासें थीथी मनूतय्क करोडौं तका दां ठगी याःगु खः ।

प्रहरीया कथं पारस लोहनीं प्रतिव्यक्ति ७ लख तका दांनिसें ३५ लख तका तक कयाः २ करोड ७५ लख तका दां ठगी याःगु खुलासा जूगु दु । पीडितपिंके दां कायेधुंकाः लोहनी सम्पर्कविहीन जुइगु जुयाच्वंगु खः ।

पारस लोहनीविरुद्ध वैदेशिक रोजगारी विभाग, बुद्धनगरय् तकं वैदेशिक रोजगारी ठगी सम्बन्धि मुद्दा अनुसन्धानया झ्वलय् दूगु धाःगु दु ।

लोहनीयात थप अनुसन्धान व कारवाहीया नितिं शुक्रवाः महानगरीय प्रहरी परिसरय् लःल्हाःगु दु ।

Categorized in दुर्घटना-अपराध