nepal life

वडाध्यक्ष व मिसा वडा दुजः गिरफ्तार

नेवा: अनलाइन न्युज | २०७४ कार्तिक २७, सोमबार १०:३५:२७

जलेश्वर नगरपालिकाया छम्ह वडाध्यक्ष सोमवाः चान्हय् थःहे दलित मिसा वडा दुजःलिसे आपत्तिजनक अवस्थाय् च्वनाच्वंगु द्वपनय् गिरफ्तारी लाःगु दु ।

गिरफ्तारय् लाःपिं जलेश्वर नगरपालिका वडा ल्याः ८ या वडाध्यक्ष विजयकुमार सिंह जूगु जिल्ला प्रहरी ज्याकुथि महोत्तरीं जानकारी ब्यूगु दु ।

सोमवाः चान्हय् १० ता इलय् जलेश्वर ८ य् च्वंगु दलित मिसा वडा दुजःया छेँय् वडाध्यक्ष सिंह व दलित मिसा वडा दुजः निम्हेसित आपत्तिजनक अवस्थाय् मिसाया किजाभ्वत, ससअबु व दाजुभ्वतपिन्सं खनेधुंकाः पिने हे निम्हेसित छेँय् कुनाः गांबासीयात सःता निम्हेसित रंगेहात गिरफ्तार याःगु प्रहरी उपरीक्षक कुबेर कडायतं धयादीगु दु ।

उम्ह मिसाया छेँया दुजःपिं व गांबासीं नायः सिंह व दलित मिसा दुजःयात ज्वनाः प्रहरी सःता सोमवाः चान्हय् ११ ता इलय् निम्हेसित प्रहरीया जिम्माय् ब्यूगु खःसा प्रहरीं निम्हेसित सोमवाः चान्हय् हे मेडिकल जाँच यानाः जिल्ला प्रहरी ज्याकुथिया हिरासतय् तःगु प्रहरीं जानकारी ब्यूगु दु । वडाध्यक्ष विजयकुमार सिंह स्वंगूगु चरणया स्थानीय तहया निर्वाचनय् नेकपा एमालेपाखें वडाध्यक्षय् विजयी जूम्ह खः ।

थ्यंमथ्यं ९ महिना न्ह्यः हे वैदेशिक रोजगारीया झ्वलय् भाःत सीम्ह उम्ह दलित मिजा दुजः नं वंगु असोज २ गते जूगु स्थानीय तहया स्वंगूगु चरणया निर्वाचनय् दलित मिसा वडा दुजलय् नेकपा एमालेपाखें विजयी जूगु खः ।

भाःत सीधुंकाः विधवा जुयाच्वंम्ह उम्ह दलित मिसा वडा दुजः सोमवाः चान्हय् थः प्यम्ह मचाखाचात लिसे देनाच्वंगु अवस्थाय् वडाध्यक्ष सिंह वया छेँय् दुहाँ वंगु व मिसालिसे आपत्तिजनक अवस्थाय् च्वनाच्वंगु द्वपं मिसाया छेँजःया मेपिं दुजः व गांबासीं ब्यूगु खः ।

प्रहरी उपरीक्षक कडायतं वडाध्यक्ष सिंह व मिसा वडा दुजःयात ब्यूगु द्वपंया सम्बन्धय् प्रहरीं घटनाया वास्तविकता छु खः धैगु विषयस थप अनुसन्धान व न्यनेकने यानाच्वंगु धाःगु दु ।

Categorized in दुर्घटना-अपराध