nepal life

लौहपुरुष गणेशमानया झ्वाताय् स्वांमाः देछाल

नेवा: अनलाइन न्युज | २०७४ कार्तिक २४, शुक्रबार १४:३२:१४

नेपाली कांग्रेसया नेता प्रकाशमान सिंहं प्रजातन्त्र सुदृढ यायेत मदुम्ह सर्वोच्च नेता गणेशमान सिंहया आर्दशयात व्यावहारिक रुपं अनुसरण यानाः आत्मसात यायेत बः बियादिल ।

प्रजातन्त्र पलिस्था व पुनःस्थापनाया नितिं जिवंकाछि संघर्ष यानादीम्ह योद्धा व बि.सं. २०४६ सालया जनआन्दोलनया सर्वोच्च कमाण्डर मदुम्ह गणेशमान सिंहया १०३ क्वःगु जन्मजयन्तीया लसताय् थौं शुक्रवाः येँया शोभाभगवतीइ च्वंगु वय्कःया झ्वाताय् स्वांमाः क्वखायेकाः नेता प्रकाशमान सिंहं प्रजातन्त्र पुनःस्थापनाया नितिं थः अबु गणेशमान यानादीगु त्याग व तपस्याया चर्चा यानादीगु खः ।

संघीय संसदया निर्वाचनय् येँ क्षेत्र ल्याः १ या उम्मेदवारतकं जुयादीम्ह कांग्रेसया पूर्वमहामन्त्री सिंहं नेकपा एमाले व माओवादी केन्द्र छप्पं जुयाः निर्वाचनपाखें साम्यवाद हयेगु म्हगस खंकूगु दु, व न्हिनय्या म्हगस जक खः, सफल जुइमखु धकाः धयादिल ।

ज्याझ्वलय् युवा तथा खेलकुदमन्त्री राजनकुमार केसीं प्रजातन्त्र पुनःस्थापनाया नितिं सर्वोच्च नेता गणेशमान सिंहया योगदान ज्वःमदूगु योगदान खः धकाः धयादिल ।

थीथी ज्याझ्वः ग्वसाः ग्वयाः प्रजातन्त्र पुनःस्थापनाया नितिं अविछिन्न योद्धा व बि.सं. २०४६ सालया ऐतिहासिक जनआन्दोलनया सर्वोच्च कमाण्डर मदुम्ह गणेशमान सिंहया जन्मजयन्ती थौं शुक्रवाः थीथी ज्याझ्वःया ग्वसाः ग्वयाः न्यायेकूगु दु ।

Categorized in राष्ट्रिय