nepal life

लोकसेवां छक्वलं ३९० म्ह शाखा अधिकृत माग यात

नेवा: अनलाइन न्युज | २०७४ मङ्सिर २७, बुधबार १३:१३:००

लोकसेवा आयोगं राजपत्राङकित तृतीय श्रेणी अप्राविधिक खुल्ला व समावेशी शाखा अधिकृतया थीथी सेवाया नितिं दरखास्त आह्वान याःगु दु ।

आयोगं बुधवाः सुचं पिथनाः खुला व समावेशी यानाः मुक्कं ३९० गू पदया नितिं दरखास्त खुला याःगु खः ।

व्यवस्थापिका न्याय, परराष्ट्र, प्रशासन व लेखा परीक्षण सेवाया नितिं दरखास्त आह्वान याःगुलि खुलापाखो २०६ पद व मिसापिनिगु नितिं ५९ पदय् दरखास्त खुला याःगु खः । समावेशीपाखे आदिवासी जनजाति, मधेसी, दलित, अपांगता व ल्यूनेलाःगु वर्गया नितिं नं पद सिर्जना याःगु आयोगं आदिवासी जनजाति, मधेसी, दलित, अपांगता व ल्यूनेलाःगु वर्गया नितिं थीथी कोटा क्वःछ्यूगु दु ।

आयोगं प्यंगू चरणया परीक्षा लिपा लिपांगु नां धलः पिथनेगु व्यवस्था याःगु दु । आयोगया कथं लिखित, सुचं प्रविधि सीप परीक्षण, मंकाः परीक्षण व अन्तरवार्ता लिपा लिपांगु नां धलः पिथनी ।

अनलाइनपाखें हे दरखास्त फारम जायेके फइगु ब्यवस्था यानातःगु दु । दरखास्त वइगु पुष १८ गतेतक बिइदइगु जूगु दु । दोब्बर दस्तुरय् पुष २५ गततक नं दरखास्त बिइ फइगु व्यवस्था यानातःगु दु ।

दरखास्तवालां आन्तरिक कासा व खुलाया नितिं द्वःछि तका दां, प्रत्येक समावेशी पुचःया नितिं थप प्यसः तका व न्याय व परराष्ट्र सेवाया थप पौया नितिं ब्यागलं ब्यागलं प्यसः तकाः दां बुझे यायेमाः ।

आयोगं दरखास्तया नितिं बुझे याइगु रकम आयोगया केन्द्रीय ज्याकुथि व येँ उपत्यकाया संकलन केन्द्र, क्षेत्रीय निर्देशनालयत व अञ्चल ज्याकुथित लिसें आयोगया ज्याकुथि दूगु जिल्ला बाहेकया जिल्ला हुलाक ज्याकुथिइ वनाः तकं मुंके फइगु ब्यवस्था यानातःगु दु ।

Categorized in लजगाः