nepal life

लोककवि गणेशलाल श्रेष्ठया १०६ क्वःगु लुमन्तिइ चिनाखँ कासा ११३७ क्वचाल

नेवा: अनलाइन न्युज | २०७४ भाद्र ५, सोमबार १३:१६:११

–अशोक सुजन श्रेष्ठ, हेटौंडा–मकवानपुर

लोककवि गणेशलाल श्रेष्ठया १०६ क्वःगु लुमन्तिइ चिनाखँ कासा ११३७ शनिवाः हेटौंडाय् क्वचाःगु दु ।

नेपालभाषा मंकाः खलः मकवानपुरं ग्वसाः ग्वःगु उगु कासाय् निम्ह मिसालिसें न्हय्म्ह कविपिन्सं धेंधेंबल्ला याःगु खः ।

कासाय् पवन शाक्य, जनार्दन नेपाल व अनिता न्यौपाने छसिंकथं न्हाप, ल्यू व लियांल्यू लाःगु खः ।

न्हाप लाःम्ह पवन शाक्ययात झिद्वः तका, ल्यू लाःम्ह जनार्दन नेपालयात न्याद्वः तका व लियांल्यू लाःम्ह अनिता न्यौपानेयात स्वद्वः तका दां सिरपाःलिसें दसिपौ लःल्हाःगु खः ।

ज्याझ्वः हेटौंडा उपमहानगरपालिका शहरी विकास अनुसन्धान व वातावरण महाशाखा प्रबन्धक बिके महर्जनया मूपाहाँसुइ न्ह्याःगु खःसा नेपालभाषा मंकाः खलः मकवानपुरया नायः मंगलकृष्ण मानन्धरया नायःसुइ जूगु खः ।

उगु चिनाखँ कासाय् नेमराज शाक्य, प्रेमजी श्रेष्ठ व माधव खनाल निर्णायक जुयादीगु खः ।

ज्याझ्वलय् नेपालभाषा मंकाः खलः मकवानपुरया संरक्षक रुद्रहरी जोशी, बरिष्ठ साहित्यकार तुलसी थापा, लोककवि गणेशलाल श्रेष्ठया काय् केशवलाल श्रेष्ठ लिसेंया व्यक्तित्वपिं पाहाँ कथं झायादीगु खः ।

ज्याझ्वलय् साहित्यकार आरसी रिजाल, विश्वनारायण श्रेष्ठपिन्सं साहित्यिक च्वसु वाचन यानादीगु खः ।

वंगु न्हय्दँ निसें लोककवि श्रेष्ठया लुमन्तिइ नेपालभाषा मंकाः खलकं हेटौंडाय् साहित्यिक ज्याझ्वः यानाः वयाच्वंगु खः ।

थुगु हे दँ थः अबु लोककवि गणेशलाल श्रेष्ठया लुमन्तिइ ज्याझ्वः यायेत ग्वाहालि यानादीम्ह लोककवि श्रेष्ठया काय् केशवलाल श्रेष्ठं मुद्दती खाताय् ५ लख तका दां मुंकादीगु दु । बैंकपाखें वःगु रकमया ब्याजं दँय् दसं लोककवि श्रेष्ठया लुमन्तिइ साहित्य ज्याझ्वः यानाः सिरपाः लःल्हायेगु जानकारी ब्यूगु दु ।

Categorized in नेवाः