nepal life

लुमन्ति दबूया न्हूधाः लिसें ‘मूति’ सफू पितब्वज्या

नेवा: अनलाइन न्युज – राकेश महर्जन | २०७४ मङ्सिर ११, सोमबार १५:०४:३३

किरणकेन रंजित लुमन्ति दबूया न्हूम्ह नायः

 त्रिभुवन विश्वविद्यालय अन्तर्गत नेपालभाषां एम.ए. याये दुगु छगुयां छगू जक संस्था नेपालभाषा केन्द्रीय विभागया ब्वँनामि पुचः लुमन्ति दबूया न्हूधाः जूगु दु ।

एम.ए. न्हापांगु सेमेष्टरय् अध्ययनरत किरणकेन रंजितया नायःसुइ न्हूधाः जूगु न्हूगु कार्यसमितिइ न्वकू विजय बज्राचार्य, छ्याञ्जे सन्जिव वैद्य, ल्यू छ्याञ्जे सिल्भा प्रधान, दांभरि कविना नकःमि, ल्यू दांभरि कविन श्रेष्ठलिसें मूदजःपिं विणा महर्जन, दर्शनवीर शाक्य, राकेश महर्जन, अर्विन्द्रमान सिं, करुणा प्रधान, श्रीधर श्रेष्ठ व पुष्पनारायण श्रेष्ठपिं च्वनादीगु दु ।

दबूया न्हूपिं पदाधिकारीपिंत विभागया नायः सृजना प्रधानं खादां न्ययेकादीगु खःसा लुमन्ति दबूया निवर्तमान नायः रामेश्वर श्रेष्ठं सिन्हः तिकादीगु खः ।

कार्यभार हस्तान्तरण न्ह्यः रामेश्वर श्रेष्ठया नायः जुयादीगु लुमन्ति दबुलिं पिथंगु ‘मूति’ नांया सफू नं ज्याझ्वलय् पितब्वज्या जुल ।

थौं सुथय् विभागया ईरा–गौरी सभाकक्षय् जूगु छगू ज्याझ्वलय् उगु सफूया पितब्वज्या मूपाहांया थासं विभागया नायः मय्जु सृजना प्रधानं यानादीगु खः ।

विभागय् एम.ए. ब्वनाच्वंपिं विद्यार्थीपिंसं यानावंगु शोधप्रबन्ध (थेसिस), अभिलेख सम्पादनया मूति (सार) जक ल्ह्ययाः उगु सफू पिथंगु खः । नेपालभाषाय् एम.ए. यायेत याःगु शोधप्रबन्धमध्ये झिंप्यम्ह विद्यार्थीपिनि थेसिस व अभिलेख सम्पादनया सारयात उगु सफुतिइ दुथ्याकातःगु दु ।

विद्यार्थीपिंसं नेवाः समाज, भाषा, साहित्यबारे यानावंगु मूवंगु थेसिसबारे नेवाः समाज आःतकं बांलाक परिचित जुइमफुगु, अनभिज्ञ हे तिनिगु लिसें विद्यार्थीपिंसं छु यानावन उकिया जानकारी नेवाः समाजयात बीत नं थुकथं सफू पिथनेमाःगु खँ लुमन्ति दबूया निवर्तमान दुजः राजेन्द्र शाक्यं कनादीगु खः ।

वैकुण्ठ लाकौलजुं विभागयात यानावंगु योगदान बारे न्ववानादिसें प्रेमशान्ति तुलाधरं वइगु मंसिर २९ गते चैन–लाकौल सिरपा बीगु घोषणा नं यानादिल ।

नेपालभाषाया साहित्यकार वैकुण्ठ लाकौलजुं थः तिरिमय्जु चैन लाकौलया नामं नीस्वंगु विभागया भवन नीस्वनादीगु खःसा ज्याझ्वलय् वय्कःया काय् श्रीकण्ठ लाकौल, श्रीरञ्जन लाकौल व म्ह्याय् ईरा श्रेष्ठ झायादीगु खः । ईरा श्रेष्ठ व वय्कःया केहेँ गौरी श्रेष्ठपिनि कुतलय् भवनया प्यंगूगु तल्ला दयेकेज्या जूगु खः ।

ज्याझ्वलय् मूपाहांया थासं न्ववानादिसें विभागीय प्रमुख प्रधानं विद्यार्थीपिनि निंतिं हे लुमन्ति दबू नीस्वंगु धयादिसें न्हू वइगु कार्यसमितिं नं न्हापा थें विद्यार्थीपिनि हितया निंतिं ज्या याना वनफयेमाः धकाः भिंतुना बियादिल ।

अथेहे, दबूया भाला लःल्हायेधुंकाः निवर्तमान नायः रामेश्वर श्रेष्ठं न्हूगु भाला काःगु टिमया प्रगतिया कामना यानादिल ।

अथेहे, दबूया न्हूम्ह नायः किरणकेन रंजितं भाला क्वबीधुंकाःया जिम्मेवारीपन महसुस जूगु, न्हापा यानावःगु ज्यायात निरन्तरता बिसें दबूया मर्मकथं ज्या यानावनेगु बचं नं बियादिल ।

अथेहे, विभागया पूर्व प्रमुख तुल्सीलाल सिं थःगु कार्यकालय् विभागयात विद्यार्थी राजु कपाली व सक्वया भाषा न्ह्यलुवाः प्रकाशमान सक्वपिंसं लःल्हानाथकूगु पुलांपुलांगु ग्रन्थयात विभागया वर्तमान नायः मय्जु प्रधानयात हस्तान्तरण यानादिल । उगु ग्रन्थत लःल्हाना कायेधुंकाः प्रधानं उकिया निंतिं माःकथंया व्यवस्था यायेगु जुइ धयादिल ।