nepal life

लुँ हे धाक्व मदुसा सर्टेज ला जुइ – महेन्द्ररत्न शाक्य

लुँया भाः धमाधम कुहाँ वयाः थौंतक दुने तोलाया ४८ द्वः जुइवं बजारय् लुँ न्याइपिं ग्राहकत अप्वःगु दु । तर बजारय् वन धाःसा लुँ न्यायेगु मदु । लुँ न्यायेत थीथी लुँ पसलय् लाइनतक च्वनेगु याःगु दु । लुँया भावय् थथे आकाझाकां यक्व कुहाँवंगु सम्बन्धय् कयाः काठमाडौं सूनचाँदी व्यवसायी संघया अध्यक्ष महेन्द्ररत्न शाक्यनाप थौं सुथय् नेवाः अनलाइन न्यूजपाखें यानागु बःचाहाकःगु खँल्हाबल्हा न्ह्यब्वयाच्वना । 

लुँया भाः तसकं कुहाँ वल ? 

  • अन्तर्राष्ट्रिय रुपं हे लुँया भाः कुहाँ वंगु खः । झीथाय् जक मखु । 

छाय् थुकथं कुहाँ वःगु ले ? 

  • छता खँला पेट्रोलियम पदार्थया भाः कुहां वंगुलिं खः । पेट्रोलिमय पदार्थया भाः न्हियान्हिथं कुहाँ वयाच्वंगु दु । थ्व हुनिं नं खः । लुँ लिकायेगु नीतिं पेट्रोलियम पदार्थ यक्व खर्च जुइ, उकिं पेट्रोलियम पदार्थ दनेवं लुँया भाः नं कुहाँ वनी । आः भाः कुहाँवंगु हुनिं थ्व नं खः । 

आः लुँ बजारय् सर्टेज जूगु हुनिं छु खः ? 

  • राष्ट्र बैंकं गुलि माः उलि लुँ ला विइमखु, माग अप्वल धायेवं अप्वयेकी मखु, अले गुकथं मागकथं लुँ बिइ फइ ? आःया स्थिति ला लुँ दंगुलिं हिं ४०–४५ किलो लुँ माः थन । तर कोटाकथं १५ किलो जक दु । उकिं हे बजारय् थ्व इलय् लुँ सर्टेज जूगु खः । 

राष्ट्र बैंक बाहेक मेथासं नं लुँ न्यानादी जुइ नि ? 

  • कानुनीरुपं लुँ पित बीगु राष्ट्र बैंक हे खः, राष्ट्र बैंकं कोटाकथं बिइगु लुँ बजारय् मिइगु खः । मेता धइगु झिटीगुण्टापाखें नं खः । तर थ्वइलय् झिटीगुण्टापाखें छम्ह व्यक्तिपाखें न्यागू तोला दुँ नं एयरपोर्टय् कानुनी खं मनूयात अलमलय् लाकल उकिं अनं नं लुँ मवल । मेता न्हापा न्याःपिसं हानं मिइ हइगु खः । तर भाः कुहाँ वयेवं मिइपिं नं म्हो जुल ।

लुँया बजाः गुबलेतक थथे जुयाच्वनी ले ? 

  • अन्तर्राष्ट्रिय बजाःया स्थिति स्वयेबलय् छुं ई थथे हे जुइ थें च्वं । मोहनी नखः न्ह्यःने वःगु दु, उगु ईया न्ह्यःतकया दुने बुलुहुँ बजाः ठीक जुइ ला । थथे धाये फइगु स्थिति मदु । याकनं हे नं बजाः ठीक जुइफु ।