नेवा: अनलाइन न्युज | २०७४ माघ २, मंगलबार १५:२५:२६

लिबियाया राजधानीइ च्वंगु छगू जक अन्तर्राष्ट्रिय विमानस्थलय् सोमवाः लडाकूपिन्सं आक्रमण यायेधुंकाः जूगु ल्वापुइ लानाः ९ म्ह मनूत सीगु दु ।

जेलय् च्वंपिं थः समर्थकपिन्त छुटेयायेत धासें लडाकूपिन्सं विमानस्थलय् हे आक्रमण यायेधुंकाः सरकारी पक्ष व आक्रमणकारी पक्षया दथुइ ल्वापु जूगु अधिकारीपिन्सं धाःगु दु ।

मिटिगा विमानस्थलय् आक्रमण जुयाः ल्वापु जुइधुंकाः विमानस्थल खाली याःगु खः । सीपिं मध्ये गुलि लडाकूपाखेया दु व गुलि आम नागरिक लाःगु दु धैगु बारे आःतक छुं सीमदुनि ।

केन्द्रीय सरकारया स्वास्थ्य मन्त्रीं फेसबुकपाखें जानकारी बियादीगु कथं ९ म्ह मनूया थीथी निगू अस्पतालय् वासः यायेगु झ्वलय् सीगु खः । मन्त्रीं धयादी, “मिटिगा विमानस्थलय् जूगु आक्रमणय् लानाः सीपिनिगु प्रारम्भिक विवरण कथं न्याम्ह मिटिगा अस्पतालय् व मेपिं प्यम्हेसिगु ताजुराय् च्वंगु मुटु शल्यक्रिया अस्पतालय् सीगु खः ।”

वय्कलं घटनाय् लानाः घाःपाः जूपिनिगु ल्याःया बारे धाःसा स्पष्ट जानकारी मदूगु धयादीगु दु ।

मिटिगा विमानस्थल त्रिपोलीपाखें पूर्वपाखे लाः । थ्व आम नागरिकं छ्यलीगु अन्तर्राष्ट्रिय विमानस्थल खः । गन सन् २०१४ मध्यपाखे विद्रोही लडाकूपिन्सं आक्रमण यानाः जूगु ल्वापु लिपा मुक्कं क्षति जूगु खः ।

उत्तर अफ्रिकी मुलुक लिबियाय् ताःई मोहमर गद्दाफीं तानाशाही शासन व्यवस्था लागू याःगु खः ।

Categorized in अन्तर्राष्ट्रिय