nepal life

लायन्स क्लब अफ बिशालबजारया न्हूपिं पदाधिकारीपिनिगु पदस्थापन व सपथ ग्रहण

नेवा: अनलाइन न्युज – ललेन्द्र शाक्य | २०७४ कार्तिक २६, आइतबार १५:०७:२९

येँया खुसिबुइँ च्वंगु नेपाः ब्यांक्वेटय् शनिवाः छगू तःजिगु ज्याझ्वःया दथुइ लायन्स क्लब अफ काठमाडौं विशालबजार व लियो क्लब अफ काठमाडौं विशालबजारया ३४ क्वःगु पदस्थापन व सपथग्रहण ज्याझ्वः जुल ।

उगु ज्याझ्वलय् येँ महानगरपालिकाया उपमेयर हरिप्रभा खड्गी श्रेष्ठ मूपाहाँ कथं झायादीगु खःसा वय्कलं ज्याझ्वःया उलेज्या त्वाःदेवाय् मत च्याकाः यानादीगु खः । अथेहे, वय्कःया हे ल्हाःतं लायन्स क्लब अफ काठमाडौं विशालबजारया स्मारिका सार्वजनिक जूगु खः ।

ज्याझ्वलय् क्लबया प्रमुख सल्लाहकार लायन चन्द्रमान शाक्यं लसकुस यानादीगु खःसा पदस्थापन पीडिजी लायन गौतममान श्रेष्ठ व पीडिजी एमजेएफ लायन भूगोल शेरचनं याकादीगु खः ।

उगु ज्याझ्वलय् लियो क्लब अफ विशालबजारया २०१६–२०१७ या नायः लिया सुशान्त तुलाधरं थःगु कार्यकालया प्रगति विवरण न्ह्यब्वयादीगु खः । अथेहे, लायन्स क्लब अफ बिशालबजारया २०१६–२०१७ या नायः उद्धब आचार्यंपाखें थःगु कार्यकालया प्रगति विवरण न्ह्यब्वयादीगु खः ।

ज्याझ्वलय् पुलांम्ह नायः उद्धब आचार्यं न्हूम्ह २०१७–२०१८ या नायः अमृतरत्न ताम्राकारयात सिट हस्तान्तरण यानाः पद बहाली याकादीगु खः ।

उगु ज्याझ्वलय् पदस्थापन जूपिं क्लबया न्हूपिं पदाधिकारीपिन्त व मूपाहाँ येँमनपाया उपमेयर हरिप्रभा खड्गी श्रेष्ठलिसें न्हूम्ह नायः ताम्राकारया जहान फस्ट लेडी जेनी ताम्राकारयात नेवाः परम्परा कथं ख्येँ सगं व धौ सगं बियाः हनेगु ज्या याःगु खः ।

ज्याझ्वलय् विशाल बजार व्यापार संघ व शेरधनी संघया नायः लायन दामोदर कार्की, लियो डिष्ट्रिक्ट प्रेसिडेन्ट राजेन्द्र बराल, डिष्ट्रिक्ट एडभ्वाइजर हरि मरहठ्ठा, पीडिजी लायन गौतममान श्रेष्ठ व पीडिजी एमजेएफ लायन भूगोल शेरचनपिन्सं भिंतुना देछानादीगु खः ।

पदस्थापन लिपा लायन्स क्लब अफ काठमाडौं विशालबजारया न्हूम्ह नायः अमृतरत्न ताम्राकारं थःगु नुगःखँ तयादीगु खः । वय्कलं २०१७ जुलाई १ निसें आःतक जूगु क्लबया प्रगति विवरण लिसें आः जुइगु ज्याझ्वःया जानकारी बियादीगु खः ।

अथेहे, लियो क्लबया न्हूम्ह उपाध्यक्ष सुरज श्रेष्ठं नं पदस्थापन लिपा थःगु नुगःखँ तयादीगु खः ।

उगु ज्याझ्वलय् लायन्स क्लबय् सानुकाजी तुलाधर व मनोज अधिकारी दुहाँ वःगु खःसा इमित न्हूपिं दुजःया रुपं सपथ ग्रहण याकूगु खः ।

Categorized in राष्ट्रिय