nepal life

लाखे भाजुया शुटिंग टिष्टुंगय् न्ह्यात

नेवा: अनलाइन न्युज – विजयरत्न | २०७४ कार्तिक २७, सोमबार १५:४१:१९

आशिष्मा नकःमि धइम्ह नेवाः संकिपा ख्यलय् जक मखसे खस नेपाली संकिपा ख्यलय् नं उत्तिकं हे लोकंह्वाःम्ह हिरोइन खः ।

आः आशिष्मा छम्ह हिरोइन जक मजुसे संकिपाया निर्माता कथं नं न्ह्यःने वइगु जूगु दु । थ्व संकिपाया नां “लाखे भाजु” खः ।

थथे लोकंह्वाःम्ह हिरोइनं दयेकेत्यंगु फिल्मया शुटिंग शनिवाःनिसें टिष्टुंगय् न्ह्याकूगु दु । वसिबें न्हापा वंगु शनिवाःखुन्हु येँया मजिपातय् च्वंगु लाखे छेँय् वनाः आशिष्मां पुजा याःगु खःसा शुटिंग न्ह्याकूगु दिन खुन्हु नं शुटिंग न्ह्याके न्ह्यः लाखे भाजु संकिपा पुचलं नेवाः संकिपाया दिवंगत कलाकारपिन्त लुमंकाः छगू मिनेट मौनधारण याःगु खँ उगु संकिपाया सह निर्देशक रवि महर्जनं जानकारी बियादीगु दु ।

“लाखे भाजु” संकिपाय् लाखे जुया म्हितीम्ह सोहित मानन्धर, नगीना जोशी, प्रकाश श्रेष्ठ, अन्नपूर्णेश्वरी श्रेष्ठ, अष्टमाया महर्जन, सर्वोत्तम चित्रकार, अनिता ताम्रकार, कृष्णभक्त महर्जन, अकल महर्जन, राजेन्द्रमान शाक्य व सबिन शाक्य कलाकारपिं नं पुजाय् झायादीगु खःसा थुके गणेशराम लाछी, हृदयप्रसाद मिश्र, भोगेन्द्र मानन्धर, नारायणदेबी प्रधानयात नं स्वयेदइगु खँ दु ।

थुगु संकिपाय् आशिष्मा नकःमियात मेन रोलय् स्वयेदइ । थ्यंमथ्यं ५० लख तका लाय् तुइगु थ्व “लाखे भाजु” दयेकेत आशिष्मायात नेपाःया संकिपा ख्यःया तसकं नांजाःपिं फिल्ममेकर व संकिपा बञ्जातसें साथ बिइगु जुगु दु । थुके आशिष्मायात थौंकन्हे नेपाःया दकले पुलांगु संकिपा बञ्जातय्गु संगठन नेपाल चलचित्र संघया नायः जुया च्वनादीम्ह प्रदिप उदय भाजुं मू रुपं साथ बिइगु जूगु दुसाः नांजाःपिं संकिपा बञ्जात गोपालकाजी कायस्थ व नरेन्द्र महर्जनया नापनापं गैर आवासीय नेपालीया रुपय् नांजाःपिं दिपक श्रेष्ठ (बेलायत), चीजकुमार श्रेष्ठ (युरोप) व सुन्दर राजभण्डारी (अमेरिका)पिन्सं नं लाय् तइगु जूगु दु ।

Categorized in कला