nepal life

रोल्पा बन्द, जनजीवनय् लिच्वः

नेवा: अनलाइन न्युज | २०७४ कार्तिक २७, सोमबार १२:२९:२२

विप्लव नेतृत्वया नेपाल कम्युनिष्ट पार्टी रोल्पां आह्वान याःगु बन्दया हुनिं रोल्पाया जनजीवन थौं सोमवाः सुथंनिसें हे लिच्वः लात । बन्दया हुनिं सुथंनिसें रोल्पाया बजाः, यातायात, कलकारखाना व शिक्षण संस्था ठप्प जूगु खः ।
जिल्ला इञ्चार्ज दलबहादुर खत्री व सेक्रेटरी सन्तोष सुवेदी लिसेंया नेता कार्यकर्ता गिरफ्तारीया विरुद्ध बन्द आह्वान याःगु विप्लव नेतृत्वया नेपाल कम्युनिष्ट पार्टी रोल्पां धाःगु दु ।

सदरमुकाम लिवाङपाखें वनीगु ताःहाकःगु व चीहाकःगु दूरीया छुं नं यातायातया साधन चले मजूगु जलजला यातायात व्यवसायी समिति रोल्पाया यज्ञश्वर आचार्यं जानकारी बियादिल । बन्दया हुनिं सुथय् कक्षाया नितिं क्याम्पस वंपिं विद्यार्थीपिं छेँय् लिहाँ वःगु खः ।

अज्ञात व्यक्तिपिन्सं मोबाइलपाखें विद्यालय बन्द यायेत इनाप याःगुलिं सुथ व न्हिनसिया कक्षाया फुक्क पठनपाठन सोमवाः बन्द यायेमाःगु सदरमुकामया हे छगू विद्यालयया शिक्षकं जानकारी ब्यूगु दु ।

सतकय् उगु पार्टीया नेता व कार्यकर्तापिनिगु उपस्थिति खनेमदुसां नं बन्दया हुनिं जिल्ला ठप्प जूगु खः । शनिवाः व आइतवाः पश्चिम रोल्पाय् चुनाव प्रचारप्रसारय् वंपिं पूर्वअर्थमन्त्री वर्षमान पुनयात लक्षित यानाः गोली प्रहार यायेधुंकाः जिल्लाय् ग्याःचिकु ब्वलंगु खः ।

Categorized in राजनीति